د ایران د بهرنیو چارو وزارت ویاند اسماعیل بقایي ویلي:« موږ د اسراییل دا کار په کلکه غندو، چې د غزې له ښار څخه فلسطینیان په زور شړي او ټوله غزه نيسي. د اسراييل دغه کړنه بشپړ نسل وژنه ده.»
ښاغلي بقايي نن شنبه (د زمري ۱۸مه) پر اېکس پاڼه د غزې بشپړ نیول «جرم» وباله. هغه زیاته کړې، فلسطین داسې یوې ډلې اشغال کړی چې نړۍوالې جزایي محکمې (ICC) او نړۍوالې عدلي محکمې (ICJ) د فسطینیانو په نسلوژنه تورنه کړې ده.
بقایي د ټولو حکومتونو او ملګرو ملتونو قانوني او اخلاقي مسوولیت ته په اشارې سره وايي:« باید د نسلوژنې او په نیول شویو فلسطیني سیمو کې د روانو لویو جنایتونو مخه ونیسي.»
بقایي د اسلامي همکاریو سازمان (OIC) څخه غوښتي، چې په دې اړه بېړنۍ غونډه راوبولي.
