دغې راډيويي شبکې چې د «نسیم» په نوم په دایکنډي او بامیان ولایتونو کې نشرات درلودل، د دوشنبې په ورځ (د زمري په ۲۰مه) وویل چې له ۱۳ کلونو وروسته یې خپل نشرات بند کړي دي. د دغې راډيويي شبکې په یوې اعلامیه کې راغلي: «کله زمانه دومره بې رحمه شي چې غږونه هم نشي زغملی.»
په دې اعلامیه کې ویل شوي، چې «نور دوام نشي ورکولی» او همداراز هیله مندي ښودل شوې چې د «شرایطو په ښه کېدو» سره به بیاځلي خپلې خپرونې پیل کړي.
د «نسیم» په نوم د راډيويي شبکې د نشراتو د درېدو خبر ۵ ورځې وروسته له هغې خپور شو، چې په دایکنډي کې د طالبانو استخباراتو د دغې راډيو مدیر مسوول او دوه خبریالان ونیول.
په دایکنډي ولایت کې سرچینو د دوشنبې په ورځ «د زمري په ۲۰مه» افغانستان انټرنشنل ته وویل، طالبانو د «نسیم» راډیو مدیر مسوول او نور کارکوونکي یې د «راډيو د نشراتو د درولو په شرط» ازاد کړي دي.
په دغه ولایت کې د طالبانو استخباراتو د تېرې چهارشنبې په ورځ د «زمري په ۱۵مه» د «نسیم» راډیو مدیر مسوول او دوه خبریالان ونیول او ورسره جوخت یې د راډيو ځينې وسایل هم ضبط کړل.
د افغانستان د خبریالانو مرکز بیا ویلي، د «نسیم» راډیو کارکوونکي د ملګرو ملتونو او همداراز د داعش او د طالبانو د نورو وسله والو مخالفینو د فعالیتونو په تړاو د راپورونو د خپرولو له امله نیول شوي دي.
په دایکنډي کې د «نسیم» راډيو د امتیاز څښتن رضا واحدي فرانسې راډیو ته ویلي، طالبانو د دغې راډيويي شبکې خبریال سیف الله رضايي په خپرونه کې د خندېدو له امله ونیوو او په ښار کې یې د «عبرت» لپاره وګرځاوه او بیا یې په دایکنډي کې استخباراتو ادارې ته ولېږداوه.
د راپورونو له مخې، د یادې شبکې خبریالان هر یو سیف الله رضايي او مجتبی قاسمي د دایکندي په مرکز نیلي ښار کې د یوې خبري غونډې په څنډه کې ونیول شول او بیا د یادې راډیو مدیر مسوول سلطان علي جوادي هم د طالبانو د استخباراتو له لوري احضار شو.
د طالبانو استخباراتو د اوس لپاره یاد خبریالان په ضمانت سره خوشې کړي دي.
د طالبانو استخباراتو له تېرو څلورو کلونو راهیسې په کور دننه پر رسنیو محدودیتونه او څارنه زیاته کړې او ورسره په رسنیو کې سانسور هم ډېر شوی دی.
په دې موده کې ګڼ شمېر خبریالان او د رسنیو نور فعالین نیول شوي او یاد کسان د طالبانو له استخباراتو په بېرته راوتو سره سانسور ته مخه کړې او هر کله یې په زړه کې وېره وي.
په افغانستان کې د رسنیو ځپنې د خبریالانو چارې ډېرې محدودې کړي او ورسره د اطلاعاتو سیستم ډېر پيچلی شوی دی.
