په قاچاق تورن روسی څیړونکی لاهم په کابل کې د طالبانو په توقیف کې دی

په پنجشېر ولایت کې طالب چارواکو د سې شنبې په ورځ، د زمري پر ۲۱مه وویل، چې د زمردو په نهمه رسمي داوطلبۍ کې ۲ زره او ۵۳۹ قیراطه زمرد، چې د یاد ولایت له کانونو ترلاسه شوي وو، د داوطلبۍ له لارې په ټولیزه توګه د ۳۴۷ زره او ۸۵۰ امریکايي ډالرو په ارزښت پر کورنیو سوداګرو وپلورل شول.

د طالبانو د پنجشیر والي حافظ محمد اغا حکیم ویلي، چې د دغه ولایت لوړکیفیته زمرد نه یوازې افغانستان له نړیوالو بازارونو سره نښلولی، بلکې د کورنیو او بهرنیو پانګوالو پاملرنه یې هم راجلب کړې ده.

د پنجشیر د والي ویاند سیف‌الدین لټون وايي، دا داوطلبي د ملي او نړیوالو سوداګرو او اړوندو ادارو په ګډون ترسره شوې او په وینا یې، پروسه په شفافه توګه پر مخ وړل شوې ده.

لټون زیاته کړې، چې زمرود تر پلورل کېدو وړاندې د مسوولو څارونکو په حضور کې له کتنې وروسته بسته بندي شول، څو د داوطلبۍ شفافیت او باور فضا خوندي پاتې شي.

د پنجشیر زمرد چې د کیفیت له پلوه په سیمه کې ځانګړی شهرت لري، په وروستیو کلونو کې د افغانستان له مهمو طبیعي شتمنیو ګڼل کېږي، خو څارونکي د طالبانو کیندنې او د داوطلبۍ پروسې غیر مسلکي او غیر شفافې ګڼي.

تازه احصایې ښيي چې د هیواد په کچه په پنجشېر کې شاوخوا ۱۷۰۰ کانونه دي، چې له دې څخه یوازې په ۲۵۰کانونو کې قانوني فعالیت پیل شوی او ۶۰۰ جوازونه ورکړل شوي دي.

ګارډین ورځپاڼې د اندرسن د کتاب ځینې برخې خپرې کړې چې د امریکا شل کلن حضور، د هغې ګډوډ پای او د طالبانو بیا واک ته راګرځېدل پکې انځور شوي دي. د همدې لپاره یې د کتاب نوم «د جګړې ماتې» ایښی دی.

نوموړي په خپله سریزه کې لیکلي دي: «په افغانستان کې د امریکا او متحدینو ماموریت یوڅه بریالی و. طالبان او القاعده غرونو ته وتښتېدل او یو لویدیز پلوه نظام یې ځای ونیو».

خو اندرسن نیوکه کوي چې امریکا او لویدیځ «هیڅکله په رښتیا افغانستان ته نه دي ننوتي. له همدې امله یې هڅې د ناکامۍ په څنډه کې وې».

په کتاب کې اندرسن د طالبانو پر اوسني واک پوښتنې را پورته کړې، چې ایا دا همغه زاړه طالبان دي که نوي؟ او وايي: «موږ واقعاً نه پوهېږو.»

هغه لیکي: «په لومړنیو نښو کې زموږ ملګرو هغه کسان ولیدل چې د کندهار دودیزې جامې یې اغوستې وې او بله ډله طالبان وو، چې د امریکا د ځانګړو ځواکونو یونیفورم یې پر تن و».

هغه زیاتوي: «موږ دا هم ولیدل چې د عکس او ویډیو اخیستل اوس ممنوع نه دي ځکه دوی سمارټ فونونه لرل. دې موږ ته یو څه هیله راکړه چې شاید دوی بدل شوي وي».

اندرسن د افغان میرمنو برخلیک ته هم اشاره کړې ده: «نږدې هره ښځه چې له ما سره یې خبرې کړې، له ما یې مرسته غوښتې چې له هېواده وتښتي. یوازې ښځې نه، بلکې ټولو هغو کسانو، چې له طالبانو سره نه وو، لکه دولتي کارکوونکي، د وزارتونو مرستیالان یا د الوتکې مېلمه پال، مرسته غوښتې».

هغه وايي: «یوې ښځې راته وویل: زه پوهېږم څه پرلاره دي، پوهېږم هغوی څه کوي او هغه سمه وه. حالت تر هغه څه چې څلور کاله مخکې مو فکر کاوه، ډېر خراب شوی. میرمنې په رسمي ډول له کوره بهر له خبرو کولو منع شوې، له نارینه خپلوانو پرته سفر نه شي کولای. زه حتا نه پوهېږم چې د روغتونونو د زیږون له برخو سره څه کوي».

اندرسن چې اوس ۶۸ کاله عمر لري، د طالبانو د دوامداره جګړو په اړه وايي: «د طالبانو دننه داسې ډلې شته چې ښايي په جګړه کې ښکېلې شي».

هغه وايي: «افغانستان هیڅکله له وینې تویولو پرته نوي پړاو ته نه دی تللی. دا لکه ځینې نور هېوادونه نه دی چې یوازې د سولې یا مدني توافق له لارې نوي پړاو ته لاړ شي. دلته همېشه نوي پړاوونه د وینې په بهېدو سره رامنځته کېږي».

په کتاب کې راغلي: «زه نه پوهېږم دا دور څنګه ماتېدای شي، خو اوسني واکمن طالبان به دا دور خپله مات نه کړي. دوی نوې بې عدالتي عملي کوي، دا حقیقت دی».

لیکوال ټینګار کوي چې «لویدیځ به بیا هم افغانستان ته مخ واړوي، ځکه افغانستان د شرم او ناکامۍ ځای دی؛ لکه څنګه چې د شوروي اتحاد لپاره و».

یاد امریکايي لیکوال وايي چې «زه تل غواړم افغانستان ته لاړ شم. افغانستان یو حیرانوونکی ځای دی، د خلکو ټولنه یې هم بې ساری ده».

د طالبانو د هرات والي دفتر د سې شنبې په ورځ وویل، چې په یاد ولایت کې د کور تر دروازې د پاسپورټ رسولو خدمات د هرات والي اسلام جار، د پاسپورټ او افغان پوست شرکت چارواکو په حضور کې پرانیستل شول.

اسلام جار د خوښۍ په څرګندولو سره ویلي، چې د پاسپورت وېش اسانه کول یې یو ارمان و.

هغه ویلي: «هر افغان دا حق لري چې پاسپورټ يې د کور تر دروازې ور ورسېږي.»

د هرات لپاره د طالبانو والي زیاته کړې: «افغان ملت په اقتصاد، ریل پټلۍ، پاسپورټ، ګاز، برېښنا او نورو ټولنیزو برخو کې د نړیوالو معیارونو سره سم د خدماتو د ترلاسه کولو مستحق دی او د دې خدماتو وړاندې کول زموږ دنده او مسوولیت دی.»

په پرانیسته کې د طالبانو د پاسپورټ عمومي رییس ویلي، چې په کابل ولایت کې کورونو ته د پاسپورټ رسولو خدمات په بریالیتوب سره فعال شوي دي.

طالبان په هرات کې د کور تر دروازې د پاسپورټ رسولو خدمات پرانیستلو په اړه داسې مهال خبر ورکوي چې لا هم د هېواد دننه خلک د پاسپورټ په اخیستلو کې ستونزه لري او له دې ریاست څخه شکایتونه کوي.

د طالبانو ریاست الوزراء اقتصادي معاونیت د سې شنبې په ورځ په یوه رپوټ کې وویل، چې دې رېل پټلیو له لارې په غیر مستقیم ډول له چین، ترکیې، روسیې او قزاقستان سره هم سوداګریز انتقالات ترسره کیږي.

یاد معاونیت دا هم وایي چې افغانستان د یادو رېل پټلیو له لارې په ورځني ډول تر لس زره او په میاشتني ډول تر ۳۰۰ زره میټریک ټنو ډېر انتقالات ترسره کوي.

طالبان ادعا کوي چې د یادو پټلیو په بیا رغونې او پراخیتا سره د ریلي ټرانسپورټ لګښتونه کم شوي؛ د سوداګریزو توکو خوندیتوب زیات شوی او له تجارتي بندرونو سره مستقیم ارتباط ټینګ شوی دی.

د طالبانو د ریاست الوزرا معاونیت په خپل راپور کې دا هم ویلي، چې د هرات- کندهار د اوسپنې پټلۍ تفصیلي ډیزاین او سروې، د بلخ-هرات د اوسپنې پټلۍ، اندخوی-شبرغان ۵۵ اوسپنیزې کرښې تفصیلي ډیزان او سروې، د اقینې- اندخوي د پاتې لس کیلومتره اوسپنیزې کرښې بشپړول، د خواف- هرات د څلورمې قطعې د لومړي فاز رغول، د تورغوندۍ بندر پراختیا او د حیرتان بندر ترمیمول هم تر کار لاندې دي.

محسن قضاتلو ویلي، د ښاروالۍ قراردادي شرکتونه د نویو کارکوونکو د جذب په حال کې دي او د دې کار لپاره یې یو اعلان هم خپور کړی دی.

نوموړي زیاته کړې، چې د تېر کال پرتله د سړکونو د پاکوالي په اړه لږ شکایتونه ثبت شوي او د ښاروالۍ موخه د ښار پاکوالی دی.

تر دې مخکې د تهران ښاروالۍ د شورا غړي ناصر اماني د ښار د پاکوالي په اړه اندېښنه ښودلې وه.

اماني د تهران له ښاروالۍ غوښتي و، چې د ۱۰زره ګوښه شویو کارکوونکو د ځای ناستو لپاره روښانه پلان وړاندې کړي.

د تهران د ښاري شورا غړي ناصر اماني تر دې وړاندې هم ویلي و، چې د افغان کډوالو تر اېستلو وروسته د ښار په ښاروالۍ کې کاري ځواک شاوخوا ۸۰ سلنه کم شوی دی. هغه خبرداری ورکړی، چې دغه وضعیت د ښاروالۍ لپاره یوه جدي ستونزه جوړه کړې ده.