د افغانستان پخواني ولسمشر حامد کرزي د خپلواکۍ ۱۰۶مې کلیزې په مناسبت ویلي: « د زمري ۲۸مه د افغانستان د خپلواکۍ ورځ د ټولو افغانانو لپاره د ویاړ او درناوۍ ورځ ده او د بهرنیو لاسوهنو د مخنیوي او د ملي یووالي د ټینګښت لپاره د افغانانو تر منځ ملي تفاهم حیاتي ارزښت لري.»
د ښاغلي کرزي په پیغام کې سپارښتنه شوې، چې د خپلواکۍ د با ارزښته میراث ساتنه او د راتلونکو نسلونو لپاره یې لېږد یوازې هغه مهال شونی دی چې افغانستان تلپاتې سولې، ټیکاو او ملي یووالي ته ورسېږي. نوموړي ویلي، چې د افغانستان پرمختګ د ټولو لپاره د زدهکړو د مساوي حق خوندیتوب له مسلې سره تړاو لري او باید په دې برخه کې کوټلي ګامونه پورته شي.
د افغانستان د خپلواکۍ د ۱۰۶مې کلیزې په مناسبت د پخواني جمهوري دورې بېلابېلو چارواکو، په پښتونخوا کې سیاستوالو، د سپورټ اتلانو، د بشري حقونو فعالانو، طالب چارواکو، مېرمنو، هنرمندانو او د خواله رسنیو کاروونکو جلا، جلا پیغامونه خپاره کړي دي.
په پښتونخوا کې سیاستوال افراسیاب خټک په خپل پیغام کې ویلي: « هیلهمن یو، چې د هېواد د ښځو او نارینهو لپاره د یوه اباد، سیال، سمسور او په ملي هویت سمبال افغانستان جوړېدو هیلې سرته ورسېږي.»
په ورته وخت کې د افغانستان د کرېکټ مشهور لوبغاړي راشد خان د خپلواکۍ د بېرته اخېستو کلیزې په مناسبت په یوه پیغام کې ویلي:« له نن څخه ۱۰۶ کاله مخکې په همدې ورځ زموږ اجدادو له انګرېز ښکېلاک څخه د ګران افغانستان ازادي او استقلال وګاټه.»
په ورته وخت کې په افغانستان دننه د طالبانو حکومت د خپلواکۍ د بېرته اخېستو د کلیزې په مناسبت عمومي رخصتي اعلان کړې او په دې اړه یې ځینې غونډې جوړې کړې دي.
د طالبانو حکومت د بهرنیو چارو او دفاع وزیرانو د خپلواکۍ په مناسبت جوړې شوې غونډه کې خبرې کړې او دغه ورځ یې د افغانانو لپاره له ویاړه ډکه ورځ بللې ده.
په ورته وخت کې د جمهوري نظام پرمهال په ایران کې د افغانستان سفیر غفور لېوال، د ملي امنیت پخواني رییس معصوم ستانکزي، د لوګر والي حلیم فدايي، د مشرانو جرګې مشر فضل هادي مسلمیار، په ملګرو ملتونو کې د افغانستان دایمي استازي نصیر اندېشه، د مالیې پخواني وزیر عمر زاخېلوال، د افغانستان لپاره د امریکا پخواني ځانګړي استازي زلمي خلیلزاد او ځینو نورو په جلا، جلا پیغامونو کې د خپلواکۍ د بېرته اخېستو ورځې په مناسبت د مبارکۍ پیغامونه خپاره کړي دي.
په ملګرو ملتونو کې د افغانستان دایمي استازي نصر اندېشه د پیغام په یوې برخه کې ویلي، چې افغانان د خپلواکۍ د ۱۰۶مې کلیزې سره هممهاله له سخت انتخاب سره مخامخ دي. هغه وايي، چې افغانان به «یا اوسنی وضعیت په حقیرانه ډول مني او یا دا چې د یوې نوې ملي، سیمهییزې او نړۍوالې کړنلارې له مخې په افغانستان کې د اوسني وضعیت د بدلون لپاره پرېکنده اقدام کوي.»
د افغانستان لپاره د امریکا پخواني ځانګړي استازي د پیغام په یوه برخه کې ویلي، که څه هم په افغانستان کې له اوږدو جګړو وروسته نسبي امنیت ټینګ شوی، د نشهیي توکو پر وړاندې مبارزه شوې او د بنسټیزو پروژو کارونه روان دي؛ خو له لاهم خلک له جدي اقتصادي ننګونو سره مخامخ دي. نوموړي په افغانستان کې د نجونو پر وړاندې د ښوونځیو او پوهنتونونو دروازو تړل یوه جدي ستونزه یاده کړې ده.
د نړۍ په بېلابېلو هېوادونو کې افغانان د خپلواکۍ د نمانځلو په موخه سړکونو ته راوتلي، ملي اتڼونه کوي او پر موټرونو یې ملي بېرغونه او د خپلواکۍ د ګټونکي او د افغانستان پخواني پاچا امان الله انځورونه لګولي دي.
د ۱۲۹۸لمریز کال (د زمري په ۲۸مه) نېټه د افغانستان پاچا امان الله خان له انګرېزانو څخه د افغانستان خپلواکي ترلاسه کړه او په دې ډول هغه ته د ملت لهخوا د «غازي» لقب ورکړل شو. له هماغې ورځې راهیسې هرکال په افغانستان کې (د زمري ۲۸مه) نېټه په پرتمین جشن نمانځل کېږي.
