د چین د بهرنیو چارو وزیر وانګ یي اعلان وکړ، چې بیجنګ په روان کال کې د افغانستان د کانونو د استخراج چارې پیلوي. وانګ یي دغه راز د چین په «یوه لار یو کمربند» پروژه کې د افغانستان د رسمي ګډون وړاندیز کړی دی.
د طالبانو د بهرنیو چارو وزارت د چارشنبې په ورځ، د زمري پر ۲۹مه، وویل، چې د چین د بهرنیو چارو وزیر په کابل کې د دې ډلې د بهرنیو چارو له وزیر امیرخان متقي سره په لیدنه کې ویلي، چې بیجنګ په روان کال کې د افغانستان د کانونو د استخراج چارې پیلوي.
پر چین نیوکې دي، چې د عینک د مسو کان د استخراج په پروژه کې په مختلفو پلمو ځنډ کوي.
وانګ یي دغه راز وړاندیز کړی، چې افغانستان د چین د یوه لار او یوه کمربند پروژې رسمی برخه وګرځي.
د طالبانو د بهرنيو چارو وزارت وايي، په دې ناسته کې متقي د افغانستان او چين دوه اړخيزې اړيکې مخ پر وده او چين د افغانستان ښه سوداګريز شريک بللی چې په وینا یې، په کلني ډول د دواړو هېوادونو ترمنځ سوداګريزه راکړه ورکړه يو ميليارد ډالرو ته رسېږي.
متقي هيله څرګنده کړې، چې په نږدې راتلونکي کې د دواړو هیوادونو تر منځ سوداګزیر حجم د پام وړ کچې ته پورته شي.
متقي دغه راز د افغانستان او چین تر منځ د اقتصادي همکاریو د پراختیا په لړ کې د ټرانسپورتي همکاریو، بانکي اړیکو او د سوداګرۍ انډول د برابرولو په برخه کې هم خپل وړاندیزونه کړي او غوښتنه یې کړې، چې د دواړو هیوادونو تر منځ د اقتصادي همکاریو د لا پراختیا او تخنیکي بحثونو لپار بین الحکومتي کمیسیونونه ګډ کار وکړي.
د طالبانو د بهرنیو چارو وزیر یو ځل بیا بیجنګ ته ډاډ ورکړی، چې د افغانستان خاوره به «هېڅکله د ګاونډیو پر وړاندې ونه کارول شي».
د چین د بهرنیو چارو وزیر په یوه ورځني سفر کابل ته تللی، چې د افغانستان، پاکستان او چین په درې اړخیزه ناسته کې ګډون وکړي.
ددې ناستې یو مهم هدف له ترهګرۍ سره ګډه مبارزه، د سي پیک پروژې امنیت، د پولو مدیریت او د عملیاتو همغږي شودل شوی. دغه راز د بیجنګ د درې اړخیزې ناستې د پرېکړو تعقیب هم ددې ناستې یو هدف ګڼل کیږي.
له دې واندې داسې رپوټونه ورکړل شوي، چې د بیجنګ په ناسته کې د سي پیک په پروژه کې د افغانستان د شاملولو یادونه هم شوې، خو په دې تړاو تراوسه درېواړو اړخونو روښانه دریځ نه دی ښودلی.
وانګ یي به د کابل له سفر وروسته سبا د پاکستان په سفر ځي او د هغه هېواد او چین د ستراتیژیک ډیالوګ د شپږمې ناستې مشري به کوي.
