الېکس پېلبات، چې د امریکا د ۲۰ کلنې جګړې له پای ته رسېدو وروسته یې له کابل څخه وروستۍ امریکايي الوتکه والوزوله، اوس غواړي د سویلي کارولینا په لومړۍ انتخاباتي حوزه کې د کانګرس څوکۍ وګټي. هغه وايي، «زه وروستی کس وم چې ووتلم، خو ماموریت لا پای ته نه دی رسېدلی».
پېلبات د خپل کمپاین د پیل ویډیو د اګست پر۲۵ خپره کړه. په دې ویډیو کې هغه خپله پوځي تجربه انځوروي او د پخواني ولسمشر جوبایډن پر مشرۍ نیوکه کوي.
هغه په ویډیو کې وايي، « جګړه مار مشران پوهېږي چې ماموریت هر څه دی. زما ماموریت روښانه دی: ولسمشر ټرمپ ته هغه مرستې برابرول چې اړتیا ورته لري، زه وروستی کس وم چې ووتلم، خو ماموریت لا پای ته نه دی رسېدلی».
پېلبات چې اوس د ماونټ پلېزنټ اوسېدونکی دی، په لومړي ځل ځان کاندیدوي. هغه په هوايي ځواک کې ۲۲ کاله خدمت کړی او د چارلسټن په ګډه اډه کې د سي ۱۷ الوتکو د ځانګړو عملیاتو مشر پاتې شوی دی.
د ۲۰۲۱کال په اګست کې نوموړی له کابل نه د امریکايي ځواکونو د وتلو پر مهال د تخلیې د وروستیو عملیاتو هوايي مشر و او پخپله یې وروستۍ امریکايي سي ۱۷ الوتکه له کابل څخه امریکا ته والوزوله.
پېلبات د۲۰۲۱ کال په سپټمبر کې خبریالانو ته د یوه کوچني افغان ماشوم کیسه وکړه چې له اوږده انتظار وروسته یې په الوتکه کې سترګې سره ورغلې. کله چې د هلک خور د بوټانو په لرې کولو کې ستونزه لرله، پېلبات د ماشوم بوټان خلاص کړل. هغه وویل، « کله مې چې پورته وکتل، د ماشوم مور راته کتل. هغې موسکا وکړه او په هغې موسکا کې مې د راحت او هیلې نښې ولیدې.»
پېلبات د خپلې کاندیدۍ په رسمي اعلامیه کې وویل چې امریکا داسې مشران غواړي چې د ولسمشر ټرمپ ترڅنګ ودرېږي او د هغه د «امریکا بیا ستره کړئ» هڅې بریالۍ کړي.
