د ملګرو ملتونو د امنیت شورا د بندیزونو څانګې افغانستان انټرنشنل ته وویل چې هند خپله هغه غوښتنه بېرته اخېستې چې د طالبانو بهرنیو چارو وزیر امیرخان متقي ته د سفر اجازه ورکړل شي څو نوي ډیلي ته ولاړ شي. هند مخکې د ملګرو ملتونو د بندیزونو له کمېټې څخه د سفر معافیت غوښتنه کړې وه.
ډېپلوماتیکو سرچینو نن یکشنبه د «وږي ۳مه» افغانستان انټرنشنل ته وویل چې هند د طالبانو د بهرنیو چارو وزیر امیر خان متقي ته بلنه ورکړې او د ملګرو ملتونو له امنیت شورا څخه یې ددغه سفر لپاره د اجازې غوښتنه هم کړې ده.
خو اوس سرچینو افغانستان انټرنشنل ته وویل، چې نوي ډیلي خپله دغه بلنه بېرته اخېستې ده.
ددغه سفر لپاره داسې مهال چمتووالی نیول کېده، چې پاکستان ته د طالبانو د بهرنیو چارو وزیر امیرخان متقي سفر هم د ملګرو ملتونو په امنیت شورا کې د امریکا د مخالفت له امله ځنډېدلی و.
سرچینو ویلي، چې تر اوسه پورې د ملګرو ملتونو امنیت شورا امیرخان متقي ته د سفر اجازه نه ده ورکړې.
که امنیت شورا د سفر اجازه ور کړي وای،نو ټاکل شوې وه چې متقي د اګست له ۲۷مې تر ۲۹ مې سفر وکړي.
تر اوسه پورې هند او د طالبانو د بهرنیو چارو وزارت په رسمي ډول څه نه دي ویلي.
د ملګرو ملتونو د امنیت شورا د اصولو له مخې باید د طالبانو هغو چارواکو ته چې د امنیت شورا په تورلېست کې شامل دي، کوربه هېواد د سفر د اجازې غوښتنه وکړي او له تایید وروسته د سفر اجازه ورکول کېږي.
