ډېپلوماتیکو سرچینو افغانستان انټرنشنل ته وویل چې هند د طالبانو د بهرنیو چارو وزیر امیر خان متقي ته بلنه ورکړې، چې دغه هېواد ته سفر وکړي. یوه بله سرچینه تاییدوي، چې هند د ملګرو ملتونو له امنیت شورا څخه ددغه سفر لپاره د اجازې غوښتنه کړې ده.
ددغه سفر لپاره داسې مهال چمتووالی نیول کېږي، چې پاکستان ته د طالبانو د بهرنیو چارو وزیر امیرخان متقي د ملګرو ملتونو په امنیت شورا کې د امریکا د مخالفت له امله ځنډېدلی دی.
د سرچینو په وینا، تر اوسه پورې د ملګرو ملتونو امنیت شورا امیرخان متقي ته د سفر اجازه نه ده ورکړې.
که امنیت شورا د سفر اجازه ور کړي، ټاکل شوې متقي د اګست له ۲۷مې تر ۲۹ مې سفر وکړي.
تر اوسه پورې هند او د طالبانو د بهرنیو چارو وزارت په رسمي ډول څه نه دي ویلي.
د ملګرو ملتونو د امنیت شورا د اصولو له مخې باید د طالبانو هغو چارواکو ته چې د امنیت شورا په تورلېست کې شامل دي، کوربه هېواد د سفر د اجازې غوښتنه وکړي او له تایید وروسته د سفر اجازه ورکول کېږي.
