د اسلام اباد سترې محکمې حکومتي ادارو ته امر کړی، چې د ۱۸ افغان وګړو د اخراج پروسه ودروي. محکمې د پاکستان کورنیو چارو وزارت، نادرا، د کډوالو څانګې، فدرالي تحقیقاتي ادارې او پولیسو ته مکتوبونه استولي. ددغو افغانانو د پي او ار کارتونه لغوه شوي او دوی پر دې پرېکړه اعتراض کړی دی.
د پاکستان قاضي القضات سرفراز ډوګر ددغه هېواد د کورنیو چارو وزارت او کډوالو اړوند ادارو ترڅنګ نادرا ادارې ته مکتوب لېږلی او د یادو ادارو پرېکړه یې ننګولې ده.
سرفراز ډوګر وايي، چې د مرحوم فضل الرحمن کورنۍ په ۲۰۰۸ کال کې د ټولو قانوني شرایطو له پوره کولو وروسته د پاکستان تابعیت غوښتنه کړې، خو د کالونو تیرېدو سره پاکستاني ادارو کوم ځواب نه دی ورکړی.
د پاکستان قاضي القضات ددې غوښتنې د ځوابولو په موخه پاکستاني ادارو ته لیک لېږلی، چې ددې غوښتنې په تړاو دې له محکمې سره خپل راپورونه شریک کړي څو محکمه یې دایره شي.
د اسلام اباد سترې محکمې امر کړی، چې تر بل امر پورې حکومت نشي کولی چې دا ۱۸ کسان له دغه هېواده وباسي.
د یادونې وړ ده، ددې قضیې راتلونکې محکمه د سېپټمبر میاشتې په ۱۸مه نېټه جوړېږي.
