د طالبانو د کورنیو چارو وزارت وايي، ددغه وزارت سرپرست د جاپان له سفیر تاکایوشي کورومایا سره د هغه د ماموریت د پای ته رسېدو په مناسبت لیدلي او په دې لیدنه کې د دواړو هېوادونو د اړیکو پر پیاوړتیا ټینګار شوی.
دغه وزارت د دوشنبې په ورځ په ایکس خپره کړې خبرپاڼه کې لیکلي، حقاني د سفیر کورومایا د خدمتونو ستاینه وکړه او ویې ویل: «د جاپان او افغانستان اړیکې ډېرې پخوانۍ دي او رغنده تعامل تل د دواړو هېوادونو ترمنځ غالب پاتې شوی دی.»
په اعلامیه کې راغلي، د جاپان سفیر په دې لیدنه کې وویل: «جاپان به د ملګرو ملتونو د چوکاټ له لارې د بدیلو معیشتونو، د نشهيي توکو پر وړاندې مبارزې او د معتادینو د درملنې په برخو کې خپلې مرستې ته دوام ورکړي.»
یاده دې وي چې جاپان له هغو هېوادونو څخه دی چې له ۲۰۰۱ کال وروسته یې په افغانستان کې د بیارغونې، تعلیم او روغتیا په برخو کې پراخې مرستې کړې دي.
