د پاکستان بندي پخواني لومړي وزیر عمران خان د افغانستان د اوسني حاکم نظام د مخالفانو د خوشحالولو لپاره د دغه هېواد د پوځ د مشر عاصم منیر روانې هڅې د کمعقلۍ ښکارندوی وبللې او زیاته یې کړه، عاصم منیر هلته چې باید اړیکې ښې کړي، په قصدي ډول یې خرابوي.
د پاکستان بندي پخواني لومړي وزیر د دغه هېواد پر حکومت او په ځانګړې توګه د پوځ پر مشر عاصم منیر د نیوکو په لړ کې د دوشنبې په ورځ (د وږي ۱۷مه) په خپله اېکس پاڼه لیکلي: «عاصم منیر د افغانستان د اوسني حکومت د مخالفانو د خوشحالولو هڅې د کمعقلۍ ښکارندويي کوي. زموږ په وخت کې په سیمه کې رامنځته شوې سوله له منځه وړي؛ هلته چې زموږ اړیکې باید ښې وای، په قصدي ډول خرابېږي.»
عمران خان یو ځل بیا له پاکستانه د افغان کډوالو د اېستنې پر بهیر له نیوکو سربېره خپله ژوره خواشیني څرګنده کړې او په وینا یې د کرښې په ها غاړه کې زلزله شوې او په اوسنیو شرایطو کې د دې پر ځای چې د مرستو لاس ورکړل شي، ستونزې لاپسې پړسول کېږي.
خان زیاته کړې: «زه علي امین ګنډاپور (د خېبر پښتونخوا اعلی وزیر) ته ځانګړې سپارښتنه کوم چې افغانستان ته لاړ شي او له مقابل لوري سره د دوه اړخیزو مسایلو په تړاو خبرې وکړي، څو وضعیت له دې ډېر خراب نه شي.»
تر دې مخکې علي امین ګنډاپور هم د کرښې په دواړو غاړو کې د ستونزو د حلولو په موخه افغانستان ته د تګ په تړاو څرګندونې کړې وې، خو د پاکستان مرکزي حکومت په هغه وخت کې دغه چاره د مرکزي دولت کار بللی و، خو عمران خان اوس د پوښتنې په ډول مطرح کوي: «جعلي وفاقي حکومت باید دې ته ځواب ووايي، مریم نواز جاپان او ټایلند ته تللې شي، نو ولې د خېبرپښتونخوا اعلی وزیر د خپل ولایت د سولې لپاره افغانستان ته نه شي تللی؟»
د نوموړي په وینا، په خېبر پښتونخوا کې د پوځ او ډرون بریدونه او ورسره د ځايي اوسېدونکو بې ځایه کول په اصل کې د تحریک انصاف ګوند له لوري د سیمه ییزې حکومتولۍ د ننګونو لپاره روان دي او زیاتوي، چې د خېبرپښتونخوا اعلی وزیر باید د دغو عملیاتو مخه ونیسي او یاد عملیات د ځايي اوسېدونکو په زیان ګڼي.
نوموړي په اډیاله زندان کې د خپل وضعیت په اړه وايي، په دوامداره توګه په انفرادي سلولونو کې ساتل کېږي، له یوه کال راهیسې یې شخصي ډاکټر ته د دې اجازه نه ده ورکړل شوې چې معاینه یې کړي، د کورنۍ غړي او وکیلان یې له لیدو څخه منع شوي او همداراز له یو نیم کال راهیسې د خپلو سیاسي ملګرو د لیدو اجازه نه ده ورکړل شوې.
