د افغانستان د پخواني ولسمشر لومړي مرستیال امرالله صالح د ازبکستان حکومت له هغې پرېکړې مننه کړې چې د پخواني جمهوري نظام پاتې شوې پوځي چورلکې طالبانو ته نه سپاري. ازبکستان ویلي د افغانستان د پخواني پوځ چورلکې طالبانو ته نه سپاري.
صالح ویلي، دا اقدام به د دواړو هېوادونو په اړیکو مثبت اغېز ولري.
امرالله صالح د جمعې په ورځ پر اېکس لیکلي: «زه د ازبکستان حکومت له هوښیارې پرېکړې مننه کوم چې د افغانستان د خلکو شتمني یې طالبانو ته ونه سپارله، دا به زموږ د دواړو هېوادونو پر اړیکو اوږدمهاله مثبت اغېز وکړي.»
هغه پر طالبانو نیوکه کړې چې د پخواني افغان هوايي ځواک الوتکې د خلکو د ځپلو، د سیمهییزو مشرانو د نیولو او تري تم کولو، د مشهور قاچاقبر بشیر نورزي د لېږد او د ترهګرو ډلو د مشرانو د انتقال لپاره کاروي.
صالح زیاته کړې: «طالبان د جمهوریت له پاتې شویو شتمنیو د خپل استبدادي رژیم د ټینګښت لپاره ناوړه ګټه اخلي او د افغانستان د څو قومي او فرهنګي جوړښت درناوی نه کوي.»
د ده په وینا، د ازبکستان پرېکړه یو «اصولي دریځ» دی چې افغانان یې د طالبانو تر واکمنۍ ډېر خوندي ګڼي.
د ازبکستان د بهرنیو چارو وزارت ویاند احراز برخانوف هغه راپورونه رد کړل چې ګواکې دغه هېواد غواړي د افغانستان د پخواني پوځ چورلکې طالبانو ته ورسپاري. هغه وویل:« دغه راپورونه حقیقت نه لري او د ازبکستان په دریځ کې هېڅ بدلون نه دی راغلی.»
په وروستیو ورځو کې داسې راپورونه خپاره شوي وو چې د ۱۴۰۰ کال په زمري میاشت کې د افغانستان د اسلامي جمهوریت له سقوط وروسته، ازبکستان ته د پخواني حکومت د هوايي ځواک یو شمېر لېږدول شوې چورلکې به «په نېږدې ورځو کې بېرته کابل ته وسپارل شي»
څو ورځې وړاندې سرچینو افغانستان انټرنشنل ته هم ویلي و، چې ازبکستان پرېکړه کړې چې د افغانستان د پخواني پوځ چورلکې به طالبانو ته وسپاري.
پر همدغه مهال ځینو رسنیو د ذبیح الله مجاهد له قوله لیکلي وو، چې ازبکستان د چورلکو د بېرته ستنولو هوکړه کړې ده.
خو تېره ورځ د ازبکستان د بهرنیو چارو وزارت طالبانو ته د چورلکو د سپارلو راپورونه «جعلي» وبلل او وې ویل چې د دغه هېواد په رسمي دریځ کې هېڅ بدلون نه دی راغلی.