د امریکا د استخباراتو ادارې (سيایاې) پخوانۍ ماموره سارا اډمز ادعا کوي، چې طالبانو په دې وروستیو کې له بګرام څخه زرګونه بهرني جنګیالي نورو ترهګریزو کمپونو ته لېږدولي او د دې لېږد د ثبت او څار د مخنیوي لپاره یې په ټول هېواد کې انټرنېټ بند کړی دی.
هغې پر نړۍوالې ټولنې غږ کړی، چې د سپوږمکیزو انځورونو په مرسته دې دا خوځښتونه مستند، راپور او خپاره کړي.
اډمز په په خپل اېکس کې لیکلي، چې له بګرام څخه د ترهګرو د انتقال د ثبتولو له لارې باید نړۍوال حکومتونه او ناظرین راویښ کړل شي، ځکه چې د هغې په وینا «له ۲۰۲۱کال راهیسې یوه لويه ترهګره شبکه په بشپړ ظرفیت سره کار کوي» او دا شبکه باید کمزورې او مالي ملاتړ یې پرې شي.
هغې ټینګار کړی: «د سپوږمکیزو انځورونو کارول اړین دي، دا خوځښتونه باید مستند شي او نړۍوال حکومتونه دې راویښ شي، چې د وضعیت جديت ته پام وکړي او نور کمزوري عملونه ودروي.»
اډمز همدارنګه له هغو حکومتونو غوښتنه وکړه، چې تر اوسه دا موضوع کم ارزښته ګڼي، ترڅو خپل دریځ بیا وارزوي او د ترهګرۍ پروړاندې جدي اقدامات ترسره کړي.
سارا اډمز د امریکا د لګښتونو د شفافیت غوښتنې ترڅنګ وویل، چې د امریکا د مالیه ورکوونکو بودیجه باید د طالبانو لپاره ونه کارول شي. هغې خبرداری ورکړ، چې که نړۍوال عمل ونکړي نو دا ترهګره شبکه به نوره هم پیاوړې شي.
تر اوسه پورې دغه ادعاوې په رسمي توګه تصدیق او شواهد یې عام نه دي او د حقایقو د معلومولو لپاره د سپوږمکیزو څېړنو او نورو ازادو سرچینو موندل حیاتي ګڼل کېږي.
