ملګرو ملتونو د طالبانو د مشر په امر د انټرنېټ پرې کېدل د افغانانو ژوند ته د جدي ګواښ لامل بللی او د دې سازمان د ویاند مرستیال فرحان حق ویلي، د انټرنېټ بندېدو په ختیځ افغانستان کې د وروستۍ زلزلې له قربانیانو سره د مرستو بهیر ګډوډ کړی دی.
حق په خپلو څرګندونو کې زیاته کړې: «انټرنېټ او مخابراتي اړیکې د طبیعي پېښو پرمهال خورا حیاتي دي. د ژغورنې ډلې د انټرنېټ له لارې ژر تر ژره خبرداري او اړین معلومات ترلاسه کوي.»
هغه ټینګار وکړ، چې د انټرنېټ بشپړ بندېدل نه یوازې د بشري حقونو او اساسي ازادیو ښکاره نقض دی، بلکې د خلکو ژوند له مستقیم ګواښ سره مخامخ کوي.
د ملګرو ملتونو د معلوماتو له مخې، د ننګرهار په وروستیو زلزلو کې د قربانیانو نیمایي برخه ښځې او نجونې جوړوي، چې په اوسني وضعیت کې یې د ژغورنې او مرستې پروسه نوره هم له ستونزو سره مخ شوې ده.
د انټرنېټ پرې کېدل د افغانستان د بانکي چارو، تجارتي معاملاتو او عامه خدماتو بهیرونه سخت ګډوډ کړي دي. دا په داسې حال کې ده، چې طالبانو د دوشنبې په ماښام د هېڅ بدیل جوړښت له رامنځته کولو پرته په ټول هېواد کې انټرنېټ او عادي مخابراتي خدمتونه بند کړي دي.
له دې اقدام سره هم مهاله د طالبانو د حکومت د ډېری وزارتونو وېبپاڼې هم له کاره لوېدلې دي او یوازې لږ شمېر دولتي سرچینې له بدیلو لارو فعالې پاتې دي.
د طالبانو د مخابراتو وزارت او د اترا په اداره کې ځینو سرچینو ویلي، چې دا پرېکړه د طالبانو د مشر په مستقیم امر عملي شوې او موخه یې د ټول هېواد په کچه د فایبر نوري شبکو بشپړه پرې کېدل دي.
