د کونړ ولایت د ناړۍ ولسوالۍ په دوکلام سیمه کې د طالبانو او پاکستاني ځواکونو ترمنځ له نن سهار نه پیل شوې نښته لاهم روانه ده، چې دواړه لوري پکې درندې او سپکې وسلې کاروي. ځايي سرچینو افغانستان انټرنشنل ته وویل، چې ډزې همدا شېبه دوام لري، خو د مرګ ژوبلې په اړه لا کره معلومات نشته.
سرچینه زیاتوي: «دوه امبولانسونه د کونړ مرکز پر لور لاړل، خو تر اوسه نه ده معلومه چې ټپیان پکې وو که مړي.»
تر دې دمه د مرګ ژوبلې په اړه کره معلومات نه دي ترلاسه شوي.
د فاروق اعظم د کورنۍ غړي وايي، چې نوموړی له خوشې کېدو وروسته، اوس خپل کور ته رسېدلی دی. سرچینو افغانستان انټرنشنل ته وویل، چې نوموړی پرون له زندان نه خوشې شوی دی. فاروق اعظم د نجونو د زده کړو د ملاتړ له امله د طالبانو د مشر په امر زندان ته اچول شوی و.
فاروق اعظم د طالبانو د اوبو او انرژۍ وزارت لوړپوړی سلاکار دی چې د طالبانو د مشر ملا هبتالله اخوندزاده په امر نیول شوی و.
سرچینو افغانستان انټرنشنل ته وویل، چې فاروق اعظم د طالبانو له زندان نه پرون خوشی شوی او خپل کور ته تللی دی.
د تلې پر اوومه سرچینو افغانستان انټرنشنل ته وویل چې طالبانو ددې ډلې د اوبو او برېښنا وزارت سلاکار فاروق اعظم له نظارتخونې څخه د کابل نظامي محکمې ته لېږدولی دی. د سرچینو په وینا، د طالبانو ځینو وزیرانو فاروق اعظم ته ویلي و، چې د ملاهبت الله په امر نیول شوی او دوی یې د ازادولو واک نه لري.
یوې سرچینې چې په دې لیدنو کې یې حضور درلود، افغانستان انټرنشنل ته ویلي و، چې ځینو طالب مشرانو فاروق اعظم د طالبانو له مشر ملاهبت الله نه بښنې غوښتلو ته هڅولی و، خو فاروق اعظم له بښنې انکار کړی و.
د طالبانو د اوبو او برېښنا وزارت دغه سلاکار د وږي پر۲۴مه خپل زوی ته په لیک کې لیکلي و، چې طالبانو د ښځو زده کړو، عصري زده کړو او د امر بالمعروف د کمزوریو د په ګوته کولو له امله زندان ته اچولی دی.
فاروق اعظم د کونړ د زلزلې پر مهال پر فیسبوک لیکلي و ، «ښځینه روغتیاپالانې دې کونړ ته ورشي څو هغو طالبانو ته یو درس شي، چې د مېرمنو تعلیم ګټور نه بولي او دا به په ټولنه کې د ښځې د تعلیم د اهمیت عملي ښه بېلګه هم وي.»
هغه د هېواد دننه او بهر پر ښځینه روغتیایي پرسونل غږ کړی و، چې که یې امکان وي عاجل دې د کونړ زلزلهځپلو ته د مرستې لپاره ورشي.
نوموړي د پوښتنې په ډول لیکلي و، «ایا زمونږ تعلیم یافته ښځې په ټولنه کی د خپل مقام د تثبیت لپاره ابتکار او قرباني ورکولای شي؟ که ځواب هو وي نو دا یې وخت دی».
طالبان په دې تورن دي، چې خپل منتقدان نیسي او د خلکو د غلي کولو لپاره یې د ویرې او ډار اچولو سیاست غوره کړی دی.
سرچینو افغانستان انټرنشنل ته ویلي، چې د قطر استخباراتي ادارې د طالبانو د بهرنیو چارو وزارت پخوانی مرستیال عبدالرحمن زاهد نیولی دی. زاهد د روان کال د زمري میاشتې په وروستیو کې نیول شوی.
د هغه خپلوان وايي، له نیول کېدو راهیسي له زاهد سره هېڅ ډول اړیکه نه ده ټینګه شوې. نوموړی د طالبانو د لومړۍ دورې په حکومت کې د بهرنیو چارو وزارت معیین و.
سرچینو افغانستان انټرنشنل ته ویلي، عبدالرحمن زاهد له ۲۰۰۱ کال راهیسې په سوداګریزو فعالیتونو کې بوخت و او په منظم ډول یې قطر، متحده عربي اماراتو، پاکستان او افغانستان ته سفرونه کول.
سرچینې زیاتوي، د قطر استخباراتي ادارې هغه د روان کال د زمري پر ۳۱مه نیولی او په تېرو دوو اونیو کې هېڅ اړیکه ورسره نه ده نیول شوې.
په دوحه کې د طالبانو یوه چارواکي هم د عبدالرحمن زاهد د نیول کېدو خبر تایید کړی او ویلي یې دي، چې له قطري چارواکو سره خبرې روانې دي، څو د نیول کېدو لاملونه څرګند شي.
تر اوسه د دغه طالب چارواکي د نیول کېدو لامل نه دی روښانه شوی.
عبدالرحمن زاهد د طالبانو د لومړۍ دورې د حکومت پر مهال د بهرنیو چارو وزارت معیین و او د طالبانو له مشهورو څېرو شمېرل کېږي.
تر دې وړاندې هم د ۲۰۱۵ کال په سپټمبر میاشت کې د دوبۍ په هوايي ډګر کې د نوموړي د نیول کېدو راپورونه خپاره شوي وو.
عبدالرحمن زاهد چې په ۱۹۶۳ کال د لوګر ولایت په خروار ولسوالۍ زېږېدلی دی، د ترهګرۍ او ځینو حساسو نړیوالو فعالیتونو له امله د ملګرو ملتونو د امنیت شورا تر بندیزونو لاندې دی.
د ملګرو ملتونو سرمنشي د عدم تشدد سیاست د ورځې په تړاو په خپل پیغام کې ټینګار کړی، چې عدم تشدد د کمزورۍ وسله نه، بلکې د زړورو ځواک دی. انتونیو ګوترش وايي، « دا د بې عدالتۍ پر وړاندې د بې کرکې ټینګاو ځواک دی».
د ملګرو ملتونو سرمنشي انتونیو ګوترش د پنجشنبې په ورځ د عدم تشدد سیاست د ورځې په مناسبت په خپل پیغام کې وویل، چې «عدم تشدد د زړورو ځواک دی، دا هغه ځواک دی چې له کرکې پرته د ظلم پر وړاندې درېږي، له بې رحمۍ پرته د ستم پر وړاندې مبارزه کوي او د واکمنۍ پر ځای د کرامت له لارې سوله رامنځته کوي».
دغه څرګندونې داسې مهال دي، چې نړۍ د جګړو او شخړو شاهد ده، خو د سولې هڅې ورځ تر بلې کمزورې کیږي.
په سویلي اسیا کې په ۲۰مه پېړۍ کې د عدم تشدد تر ټولو ستر شخصیتونه مهاتما ګاندي او خان عبدالغفار خان وو.
ګاندي په هند کې د بریتانیايي استعمار پر وړاندې د عدم تشدد د سیاست له لارې د ازادۍ هڅې کولې، خو په افغانستان او پښتونخوا کې د دغه سیاست مخکښ سوله خوښی مبارز خان عبدالغفار خان و.
هغه د «خدایي خدمتګار» غورځنګ (سور پوښو) مشري وکړه، چې زرګونه پښتانه یې د عدم تشدد پر بنسټ د استعمار پر وړاندې ودرول. د هغه پیغام دا و چې تاوتریخوالی نه، بلکې علم، خدمت او زغم د خلکو د حقیقي ازادۍ لارې دي.
غفارخان ویل، « زه غواړم پښتانه د علم او عدم تشدد په وسله سمبال کړم».
نوموړي خپل ژوند د سولې، تعلیم او ولسي یووالي لپاره وقف کړی و او سره له دې چې کلونه کلونه یې د انګریزانو او وروسته د پاکستان په زندانونو کې تیر کړل، خو هیڅکله یې د عدم تشدد پر سیاست او خپل شعار معاملې ته غاړه کېنښوده.
د طالبانو د کورنیو چارو وزارت وایي، د پروان ولایت د نشه يي توکو ضد ځواکونو په مرکز «خلیفه صفا» سیمه کې د یو پلورونکي پر کور عملیات کړي چې د وسلو او نشه يي توکو زېرمه یې پکې موندلې ده.
د وزارت د خبرپاڼې له مخې، په دغو عملیاتو کې اووه میله کلاشنکوفونه، یو میل راکټ، نهه لاسي بمونه، درې مخابرې، د راکټ مرمۍ، لاسي بمونه، څو شاجورونه، ۲۶۵ ګرامه چرس او ۲۸ زیکب ګولۍ کشف او ضبط شوې دي.
خبرپاڼه زیاتوي، د دغو وسلو او نشهيي توکو په تړاو تر اوسه څوک نه دي نیول شوي، خو د موضوع د څېړلو او احتمالي تورنو کسانو د موندلو هڅې روانې دي.
د طالبانو د کورنیو چارو وزارت ټینګار کړی، چې د وسلو او نشهيي توکو پر وړاندې د دوی مبارزه به دوام ولري او په دې تړاو به د نورو عملیاتو لړۍ هم پراخه شي.
په کابل کې د ایران سرپرست سفیر عليرضا بېکدلي د کرنې او مالدارۍ د محصولاتو د نندارتون پر مهال وویل، چې د افغانستان او ایران ترمنځ ګډې همکارۍ کولای شي د کرنې او مالدارۍ په سکتورونو کې د پام وړ ګټې ولري.
نوموړي زیاته کړې، چې د ایران خصوصي سکتور چمتو دی د کرنیزو او مالدارۍ صنایعو د زیربناوو په پراختیا کې مهم رول ولوبوي.
د بېکدلي په وینا، افغانستان دا مهال د یخچالونو، معیاري قصابیو، د کرنیزو ماشینونو د تولید، د اوبو لګولو د وسایلو او همدا راز د کرنیزو محصولاتو د پروسس او بستهبندۍ برخو کې جدي اړتیا لري.
پرون د ایران او ازبکستان استازي په کابل کې د طالبانو د کرنې وزارت ۳۳ نندارتون کې یوې کیږدۍ ته ورغلي وو.