د یو ورځنیو لوبو لړۍ په درېیمه او وروستۍ لوبه کې به نن افغان لوبډله د بنګلهدېش پر وړاندې د لوبو ډګر ته ښکته شي. دغه لوبه به د افغانستان په وخت له غرمې وروسته په ۳:۰۰ بجو په متحده عربي اماراتو کې پیل شي.
افغانستان د یو ورځنیو لوبو روانې لوبلړۍ دوه لوبې ګټلې دي او دغه سریز یې په خپل نوم کړی.
افغانستان په دویمه یو ورځنۍ لوبه کې بنګلهدېش ته د ۸۱ منډو په توپير ماتې ورکړه او دویمه سیالۍ یې هم وګټله. د ابراهیم ځدراڼ غوره توپوهنې او د راشد خان بریالۍ توپاچونې افغان لوبډله بریا ته ورسوله.
د افغانستان او بنګلهدېش د کرېکټ ملي لوبډلو ترمنځ د دویمې یو ورځنۍ لوبې پچه افغان لوبډلې وګتله او لومړۍ یې د توپوهنې پرېکړه وکړه.
افغان لوبډلې د خپلو ټولو لوبغاړو په سوځېدو په ۴۴.۵ اور کې ۱۹۱ منډې هدف وټاکه.
افغان توپووهونکي ابراهیم ځدراڼ په ۱۴۰ توپونو تر ټولو ډېرې ۹۵ منډې جوړې کړې.
د بنګلهدېش لوبغاړي په ۲۸.۳ اور کې یوازې ۱۰۹ منډې جوړې کړې او د ۸۱ منډو په توپير یې ماتې وخوړه.
افغان توپ اچونکو راشد خان پنځه او عظمت الله عمرزي درې لوبغاړي وسوځول.
ابراهیم ځدراڼ د همدې سیالۍ غوره لوبغاړی وټاکل شو.
د یادولو ده، چې افغانستان د یادې لوبلړۍ لومړۍ لوبه له بنګلهدېش څخه د پنځو ویکټو په توپیر ګټلې وه.
د افغانستان او بنګله دېش ترمنځ د یو ورځنیو لوبو د روان سریز دویمه لوبه نن د ابوظبۍ په شیخ زاید کرېکټ لوبغالي کې ترسره کېږي.
لوبه به نن شنبه د افغانستان پر وخت له غرمې وروسته دوه نیمې بجې پیل شي.
د یوه ورځنیو لوبلړۍ لومړنۍ سیالۍ افغانستان ګټلې وه او که ننۍ لوبه هم وګټي نو دغه سېریز به په خپل نوم کړي.
وړاندې بنګلهدېش د شل اوریزو سیالیو د سېریز په دریو لوبو کې افغانستان ته پرلهپسې ماتې ورکړې وې چې له له کبله یې د کرېکټ د څارونکو او مینه والو غبرګونونه راپارولي و.
د افغانستان د کرېکټ بورډ ادارې د معلوماتو له مخې، افغان لوبډله به خپله درېیمه لوبه د اکټوبر په ۱۴مه نېټه ترسره کړي.
د افغانستان فوټبال ملي لوبډله چې د پاکستاني حکومت له لوري د ویزو ورکړې له څو ورځني ځنډ سره مخ شوې وه؛ بالاخره اسلاماباد ته رسېدلې ده. افغان لوبډله به د ۲۰۲۷کال د اسیایي ملتونو جام مقدماتي سیالیو په ترڅ کې د پاکستان ملي لوبډلې سره مخ شي.
د پاکستان د فوټبال فدراسیون (PFF) د خبر له مخې؛ افغان لوبډله تېر ماښام اسلاماباد ته رسېدلې او ټاکل شوې، چې نن پنجشنبه د (تلې ۱۷مه) له خپلې سیالې کوربه لوبډلې سره ولوبېږي. دغه سیالي د ماسپښین په ۲بجو جناح لوبغالي کې پیلېږي.
د راپورونو له مخې؛ د افغان لوبډلې سفر د ویزو د نه صادرېدو له کبله له خنډ سره مخ شو او له امله یې د لوبو د احتمالي ځنډېدو اندېښنه هم پرځای ده. پاکستاني چارواکو د چهارشنبې په ورځ اعلان وکړ، چې د بهرنیو چارو وزارت، د کورنیو چارو وزارت او د پاکستان د فوټبال فدراسیون ترمنځ له همغږۍ وروسته د افغان لوبډلې د سفر پلان او اداري چارې بشپړې شوې دي.
د پاکستان د فوټبال فدراسیون د مشر سید محسن ګېلاني په وینا؛ د افغان لوبډلې ځینې لوبغاړي له خپل هېواده بهر مېشت دي او هغوی باید افغانستان کې د پاکستان سفارت دننه بایومېتریک ترسره کړی وای، چې له همدې امله دغه بهیر کې ځنډ رامنځته شوی دی. نوموړي زیاته کړه: «هغه لوبغاړي او چارواکي چې په افغانستان کې وو، خپلې ویزې یې ترلاسه کړې دي؛ خو هغه لوبغاړي چې بهر مېشت دي، د افغانستان فوتبال فدراسیون او سفارت ترمنځ د هوکړې له مخې باید بېرته کابل ته د بایومټریک لپاره ستانه شوي وای».
د یاد فدراسیون په وینا؛ د ملي لوبډلې غړي له بېلابېلو هېوادونو لکه اروپا، اسټرالیا، متحده ایالاتو، کاناډا او اسیا څخه اسلاماباد ته ورځي.
ګېلاني وویل، چې د پاکستان فدراسیون (د سپتمبر په ۲۷مه) د افغانستان د رسمي لوبغاړو نوملړ ترلاسه کړی او هممهاله یې د هغو بهر مېشتو لوبغاړو د مرکې د ځای بدلولو غوښتنه هم ترلاسه کړې ده. هغه یادونه وکړه، د اسیا فوټبال کنفدراسیون (AFC) مقررات ټیمونو ته حکم کوي چې لږ تر لږه ۳۰ورځې مخکې له سیالۍ د ویزې غوښتنه وکړي.
دغه سیالي د افغانستان او پاکستان دواړو لپاره د اسیایي ملتونو د ۲۰۲۷ جام په درېیم پړاو کې ډېره مهمه ده. د جناح لوبغالي امنیتي او لوژستیکي چمتووالی بشپړ شوی او تمه کېږي، چې د دواړو هېوادونو زرګونه مینهوال به د خپلو لوبډلو د ملاتړ لپاره لوبغالي ته ورشي.
د لوبو مهالوېش
پاکستان او افغانستان دواړه د E ډلې په جدول کې د وروستي کتار برخه دي. سوریې د دغه ډلې له لارې د مخکښې لوبډلې په توګه راتلونکي پړاو ته لاره موندلې او د هغو ۱۸ لوبډلو برخه ګرځېدلې، چې نېغ په نېغه وروستي پړاو ته تللي دي.
پاکستان به له افغانستان سره تر کورنۍ لوبې وروسته (د اکټوبر په ۱۴مه) نېټه بېرته په کویټ کې د همدې لوبې د بیا لوبولو کوربه وي. د دغه پړاو وروستۍ لوبه د پاکستان لپاره د ۲۰۲۶ کال د مارچ په ۳۱مه د میانمار پر وړاندې ټاکل شوې ده.
د بلومبرګ خبري اژانس د راپور لهمخې، د فوټبال ستوری کرېتسیانو رونالډو د فوټبال په تاریخ کې لومړنی لوبغاړی شو، چې خپل نوم یې د میلیاردر فوټبالر په توګه ثبت کړ. د دغې رسنۍ د ارزونو لهمخې، د دغه پرتګالي ۴۰ کلن ستوري د خالصې شتمنۍ ارزښت ۱ اعشاریه ۴ میلیارد ډالرو ته رسېږي.
د بلومبرګ د راپور پربنسټ، د رونالډو په دغې شتمنۍ کې د فوټبال له اړخه عواید، پانګونې او تبلیغاتي قراردادونه شامل دي. هغه له ۲۰۰۲ کال راهیسې د فوټبال له قراردادونو څه باندې ۵۵۰ میلیونه ډالره ترلاسه کړي او یوازې له «نایکي برنډ» څخه چې ۱۰ کلن قرارداد دی، په کال کې شاوخوا ۱۸ میلیونه ډالره عاید لري.
په ۲۰۲۲ کال د سعودي عربستان له النصر لوبډلې سره د رونالډو قرارداد د ده په عایداتي برخه کې د عطف ټکی ګڼل کېږي. هغه د سعودي عربستان د فوټبال له حرفه يي لیګ سره په یو ځاییدو د فوټبال په تاریخ کې تر ټولو لوړ قرارداد په خپل نوم ثبت کړ، یعنې په کال کې د ۱۷۷ میلیونه پونډو قرارداد. له یاد لیګ سره د دوو نورو کلونو لپاره د قرارداد په غځولو سره یې له دغه لیګ څخه عاید شاخوا ۴۰۰ میلیونه ته رسېږي.
د کریستیانو رونالډ اصلي سیال لیونل مسي له مالیاتو کسر مخکې د فوټبال له درکه شاوخوا ۶۰۰ میلیونه ډالره عاید درلود. هغه په ۲۰۲۳ کال کې له انټرمیامي سره په یو ځاییدو هر کال شاوخوا ۲۰ میلیونه تضمین شوي حقوق ترلاسه کوي. دغه شمېر بیا د رونالډو د کلني عاید یوازې ۱۰ سلنه جوړوي.
رونالډو تر اوسه د پرتګال لپاره ۲۲۳ ملي لوبې کړي او اوس نه یوازې د فوټبال له اړخه، بلکې د سوداګرۍ او پانګونو په برخه کې هم داسې یوه دریځ ته رسېدلی، چې ډېرو کمو کسانو تجربه کړی دی.
افغان کرېکټ ملي لوبډلې د درېیو یو ورځنیو سیالیو د لوبلړۍ په لومړۍ لوبه کې بنګلهدېش لوبډلې ته ماتې ورکړه. افغان اتلانو د بنګلهدېش له لوري ورکړل شوی د ۲۲۲ منډو هدف ترلاسه او ورسره یو د صفر پر وړاندې مخکې شول. دغه سیالۍ د چهارشنبې په مازدیګر پیل او تر نیمې شپې یې دوام وکړ.
د افغانستان د کرېکټ بورډ په وینا، د دغې سیالۍ پچه بنګلهدېش وګټله او لومړی یې د افغان اتلانو پر وړاندې د توپوهنې پرېکړه وکړه او د خپلو ټولو لوبغاړو په سوځېدو سره یې ایله ۲۲۱ منډې وکړې او افغان اتلانو ته یې د ۲۲۲ منډو هدف وټاکه.
افغان کرېکټ لوبغاړو بیا د پنځو لوبغاړو په سوځېدو سره په ۴۸ اور کې یاد شوی هدف ترلاسه او ورسره یې سیالې بنګالۍ لوبډلې ته په ماتې ورکولو سره په روانه لوبلړۍ کې یو د صفر پر وړاندې مخکې شول.
د افغان لوبډلې په ګټه راشد خان او عظمت الله عمرزي ۳-۳، غضنفر ۲ او ننګیال خروټي یوه ویکټه ترلاسه کړه. عظمت الله عمرزي لومړی په توپ اچونه کې ۳ ویکټې ترلاسه کړې او وروسته یې په توپوهنه کې په ۴۴ توپونو ۴۰ منډې جوړې کړې او له همدې امله د دغې لوبې غوره لوبغاړی انتخاب او جایزه یې ترلاسه کړه.
له دې سره سم، د افغانستان کرېکټ ملي لوبډلې لوبډلمشر حشمت الله شهیدي په نننۍ لوبې سره د لوبډلمشر په توګه خپله ۵۰ نړۍواله یو ورځنۍ لوبه هم وکړه او له اصغر افغان وروسته دویم افغان لوبډلمشر شو، چې په ۵۰ نړۍوالو یو ورځنیو سیالیو کې د افغان لوبډلې د مشرۍ دنده پرمخ وړي.
په ورته وخت کې د افغانستان کرېکټ ملي لوبډلې ځلانده ستوري راشد خان بیا په یو ورځنیو نړۍوالو سیالیو کې ۲۰۰ ویکټې بشپړې کړې او لومړنی افغان لوبغاړی شو چې د لوبې په دې بڼه کې ۲۰۰ ویکټې ترلاسه کوي.
نوموړي په خپله ۱۱۵مه نړۍواله یو ورځنۍ لوبه کې دغه ویاړ ترلاسه کړ او پر بنسټ یې په نړۍ کې شپږم لوبغاړی شو، چې د نورو پرتله په کمو سیالیو کې ۲۰۰ ویکټو ته رسېږي.
د یادونې وړ ده، چې د افغانستان او بنګلهدېش تر منځ دویمه یو ورځنۍ سیالۍ به د اکټوبر په ۱۱مه او درېیمه یا وروستۍ سیالۍ به د اکټوبر په ۱۴مه ترسره شي.