د تېر جمهوري نظام پر مهال د خوست والي محمد حلیم فدايي وايي: «پاکستان پرون د نیابتي ډلو له لارې د افغانانو پر خلاف جګړه کوله او نن د ټولو قوانینو خلاف په سپين سترګی د افغانستان پر زړه او ولایتونو متواتري حملې کوي.»
حلیم فدايي د جمعه په ورځ پر خپله اېکس پاڼه لیکلي، چې د پاکستان د بریدونو لامل «د پاکستان د نیابتي ډلې حاکمیت دی»
نوموړي لیکلي: «تر اوربند وروسته د پاکستان ظالم او جابر رژيم پر پکتیکا برید کړی او د محلي کرېکټ لوبغاړې یې شهیدان کړي دي.»
د فدايي په خبره پر افغانستان د پاکستان برید نوی نه دی: «پرون یې غیر مستقیم او نن مستقیما تجاوز کوي. د پاکستان تېری او اشغال تر لمر روښانه دی. اما دا په دې مانا نه ده چې په دې بهانه «طالب شویي» وشي.»
فدايي ټینګار کړی، چې تر هغو باید د طالب او پاکستان دوښمني ونه منل شي تر څو چې یې ولسواک نظام نه وي منلی.
هغه لیکلي: «تر هغې د طالب او پاکستان دوښمني ونه منئ، ترڅو یې چې فورا ولسپال او ولسواک نظام نه وي منلي، تر هغې یې چې د نجونو پرمخ ښوونځي نه وي خلاص کړي. ترڅو یې د ولس سیاسي او مدني حقونه نه وي ورکړي.»
فدايي زياتوي، چې دوی نن افغانستان په نړېوال سټیج منزوي، فقیر او محتاج کړی دی.
