د افغانستان کرېکټ بورډ د پکتیکا پر ارګون ولسوالۍ د پاکستان په هوايي بریدونو کې د کرېکټ د سیمه ییزو لوبغاړو د وژل کېدو په غبرګون کې له پاکستان سره راتلونکې شل اوریزې سیالۍ چې ټاکل شوې وه د نومبر په وروستیو کې ترسره شي لغوه او په یاده درې اړخیزه لوبلړۍ کې د نه ګډون پرېکړه وکړه.
د افغانستان کرېکټ بورډ د جمعې په ماخوستن (د تلې ۲۵مه) د یوې خبرپاڼې په خپرولو سره ویلي، په یاده بمبارۍ کې د ارګون ولسوالۍ د کبیر، صبغتالله او هارون په نومونو د درېیو لوبغاړو په ګډون د اتو هېوادوالو پر وژل کېدو او ۷ نورو ټپيانېدو ژوره خواشیني څرګنده کړې ده.
کرېکټ بورډ په یاده پېښه کې د وژل شویو کرېکټ سیمه ییزو لوبغاړو شمېر ۳ ښودلی په داسې حال کې چې تر دې مخې د وژل شویو کرېکټ سیمه ییزو لوبغاړو شمېر ۸ ښودل شوی و.
دغه لوبغاړي په ښرنه کې په یوې دوستانه سیالۍ کې له ګډون وروسته بېرته خپل کور کلي ته ستانه شوي و، چې د پاکستان د هوايي بریدونو ښکار شول.
د افغانستان کرېکټ بورډ مشرتابه دغه پېښه د افغان ورزشکارانو، لوبغاړو او د کرېکټ د کورنۍ لپاره ستره ضایعه بللې او د وژل شویو کسانو له کورنیو او د پکتیکا له ولس سره خپله ژوره خواخوږي او غمشریکي څرګنده کړې ده.
دغه بورډ د پاکستان د یاد برید په غبرګون او له امله یې قربانیانو ته د درناوي په موخه، د پاکستان پر وړاندې راتلونکې شل اوریزې سیالۍ، چې ټاکل شوې وه د نومبر میاشتې په وروستیو کې ترسره شي، لغو کړې او په یاده درې اړخیزه لوبلړۍ کې د نه ګډون پرېکړه وکړه.
