سرچینو افغانستان انټرنشنل-پښتو ته ویلي، چې نن دوشنبه د (تلې ۲۸مه) په تورخم کې پاکستاني لوري د دروازې د پرانېستلو لپاره خپل تدابیر نیولي. سرچینې وایي، ښايي نن یوازې د بار وړونکو موټرو او سبا سېشنبه د مساپرو پرمخ په بشپړه توګه دغه لاره پرانېستل شي.
سرچینه وایي، په تورخم کې د بار وړونکو موټرو د سکین او ګمرک مامورین د چارو مخته وړلو لپاره غوښتل شوي دي. تر اوسه دا نه ده معلومه چې څو بجې لاره پرانېستل کېږي؛ خو اټکل شوی چې ښايي د نن ورځې په اوږدو کې دغه اقدام وشي.
نن ۹مه ورځ ده، چې د طالبانو او پاکستاني ځواکونو ترمنځ پر ډیورنډ کرښه د جګړو له کبله پر ډیورنډ کرښه ټولې لارې د تګ راتګ او همدا راز د سوداګرۍ پرمخ تړل شوې دي. له دې امله سوداګرو ته درانه مالي زیانونه هم اوښتي دي. له همدې امله په دواړو هېوادونو کې د خوراکي توکو بیې هم لوړې شوې دي.
