د طالبانو ویاند ذبیح الله مجاهد د پاکستاني ځواکونو له خوا پر سپین بولدک برید تایید کړ او وايي، طالبانو د مذاکراتو په احترام او د ملکي خلکو د مرګ ژوبلي مخنیوي په موخه تر اوسه کوم غبرګون نه دی ښودلی.
د طالبانو ویاند اعلان وکړ، چې د مذاکراتو په تیره ناسته کې د اوربند د غځیدو او د تیري پر نه کیدو موافقه شوې وه، خو پاکستاني ځواکونو یوځل بیا سپین بولدک کې برید کړی او طالبانو یې پر وړاندې غبرګون نه دی ښودلی.
د طالبانو د صنعت او سوداګرۍ وزارت مرستیال مولوي احمدالله زاهد وايي، د تعرفې کمېټه به پر هغو وارداتي توکو مالیه یا تعرفه لوړه کړي، چې په هېواد کې یې د تولید کچه لوړه شوې او د داخلي اړتیاوو د پوره کولو جوګه دي.
مولوي زاهد دا څرګندونې د تولیدي او خدماتي ظرفیتونو د پېژندنې اوولسم نړیوال نندارتون د پرانیستې په مراسمو کې کړې دي.
هغه وویل، د تعرفې کمېټه په خپلواکه توګه فعالیت کوي او موخه یې دا ده چې د کورنیو تولیداتو ملاتړ وشي او د وارداتي محصولاتو پر ځای د هېواد دننه تولید ته لومړیتوب ورکړل شي.
هغه پر افغان تولیدوونکو غږ کړی چې کېفیت او بیو ته ځانګړې پاملرنه وکړي څو د ولس باور په خپلو داخلي تولیداتو لوړ شي.
د زاهد په وینا، د افغانستان صنعتګر د کمزوري زیربنا، لوړې بیې او د بازار د نشتوالي له امله له ستونزو سره مخ دي، خو وزارت هڅه کوي د تعرفې او سوداګرۍ تګلارو له لارې د دوی ملاتړ وکړي.
هغه زیاته کړه چې د کورنیو تولیداتو د ودې او د ځانبساینې لپاره، د طالبانو حکومت د پانګونې، تولید او صادراتو د پراختیا لپاره ځانګړې طرحې عملي کوي.
د تولیدي او خدماتي ظرفیتونو دا نندارتون د افغانستان د صنعت او سوداګرۍ وزارت په همغږۍ د خصوصي سکتور له خوا جوړ شوی، چې د بېلابېلو ولایتونو او بهرنیو شرکتونو استازو پکې ګډون کړی دی.
له ماشومانو څخه د ملګرو ملتونو د ملاتړ صندوق(یونیسف) اعلان کړی چې د اسیا پرمختیایي بانک د ۲۷۰میلیونه ډالرو په مالي ملاتړ سره به د افغانستان په ۱۷ولایتونو کې د اړینو روغتیایي خدمتونو د پراختیا او دوام لپاره کار وکړي.
یونیسف ویلي، دا مرسته به له ۱۳۰۰روغتیایي مرکزونو ملاتړ وکړي چې د مور او ماشوم روغتیا، واکسین، تغذیه، رواني ملاتړ، او د ساري ناروغیو درملنې برخې پکې شاملې دي.
د یاد بنسټ په وینا، لا هم د افغانستان د څلورو وګړو له ډلې یو تن داسې روغتیایي مرکز ته لاسرسی نه لري چې له یو ساعت څخه په کم واټن کې وي.
د یونیسف استازي ډاکټر تاجالدین ویلي، د اسیا پرمختیایي بانک مرسته د روغتیایي خدمتونو د دوام ترڅنګ د ښځینه کارکوونکو د روزنې او د یو پایدار روغتیایي سیستم په بنسټیزتیا کې مرسته کوي.
دغه ملاتړ به د ۲۰۲۶ کال تر پایه پورې دوام وکړي، او له دې لارې به د کورنیو لپاره د روغتیایي لګښتونو د جبران په موخه نغدې مرستې هم برابرې شي.
د ملګرو ملتونو په وینا، د نړیوالو مرستو د کمېدو له امله په افغانستان کې سلګونه روغتیایي مرکزونه تړل شوي او د ښځینه ډاکټرانو کمښت لا هم یوه جدي ستونزه ده.
په استانبول کې سرچینو افغانستان انټرنشنل – پښتو ته وویل چې د طالبانو او پاکستاني پلاوي تر منځ د خبرو اترو درېیم پړاو د ترکیې په استانبول ښار کې پیل شوی. دا خبرې داسې مهال پیلږي، چې په سپین بولدک کې محلي سرچینې وايي، پاکستاني ځواکونو یوځل بیا ډزې کړې دي.
د معلوماتو له مخې، په دې خبرو کې د طالب پلاوي مشري د طالبانو د استخباراتو مشر عبدالحق وثیق او د پاکستان له لوري د دغه هېواد د استخباراتو(ای ایس ای) مشر عاصم ملک پر غاړه لري.
د طالبانو له لوري په دې ناسته کې د کورنیو چارو وزارت اداري مرستیال رحمت الله نجیب، انس حقاني، د بهرنیو چارو وزارت ویاند عبدالقهار بلخي، د طالبانو د قطر دفتر سرپرست سهیل شاهین او د بهرنیو چارو وزارت د دوهم سیاسي ریاست رییس ذاکر جلالي هم ګډون لري.
سرچینې زیاتوي، په دې پړاو کې به دواړه لوري د تېرې ناستې د پرېکړو د پلي کولو څرنګوالي او د پاتې موضوعاتو په اړه خبرې وکړي. دا موضوعات د پاکستاني طالبانو تحریک( ټي ټي پي) د فعالیتونو او د داعش ډلې له ګواښونو سره تړاو لري.
په تېرو دریو اونیو کې د طالبانو او پاکستان تر منځ څو پړاوه خبرې اترې وشوې، خو تر اوسه کومه څرګنده پایله نه لري.
اسلاماباد طالبان د «ټي ټي پي» په ملاتړ تورنوي، خو طالبان دا ادعاوې ردوي او وایي چې دا مساله د پاکستان کورنۍ موضوع ده او دا هېواد غواړي چې د خپلو امنیتي ځواکونو ناکامۍ د افغان طالبانو پر غاړه واچوي.
دا په داسې حال کې ده چې د دواړو لوریو اړیکې د تېرو څو اونیو په اوږدو کې له جدي ترینګلتیا او نښتو سره مخ شوې دي.
د طالبانو د کرنې وزیر په کابل کې د هند له شارژدافیر سره کتلي او د کرنې، اوبو لګولو، مالدارۍ، کرنیزو محصولاتو او کرنیزو وسایلو د پراختیا په برخه کې د همکارۍ په اړه یې ورسره خبرې کړې دي.د هند شارژادافیر په کابل کې د افغان-هندو په نامه د څیړنو مرکز د جوړولو خبر ور کړی.
د طالبانو د کرنې وازت د پنجشنبې په ورځ، د لړم ۱۵مه، وویل، چې د یادې ډلې د کرنې وزیر عطا الله عمري په کابل کې د هند له شارژدافیر سره د لیدنې پرمهال د دواړو هېوادونو ترمنځ د سوداګریزو راکړو ورکړو او کرنیزو زیربنايي پروژو په اړه خبرې کړې دي.
د طالیانو د کرنې وزیر له هند څخه د لابراتوارونو د تجهیز، د اوبو او برېښنا بندونو د جوړولو او د مالدارۍ د کیفیت د کنټرول د لابراتوارونو د پیاوړتیا په برخه کې د همکارۍ غوښتنه کړې ده.
طالبانو ویلي، چې د هند شارژدافیر په افغانستان کې د “افغان ـ هندو” په نوم د څیړنې مرکز جوړولو ژمنه کړې ده او وايي، هڅه کوي، چې په افغانستان کې نوې پروژې پلي کړي.
په استانبول کې سرچینو افغانستان انټرنشنل – پښتو ته وویل چې شېبه وړاندې د طالبانو او پاکستاني پلاوي تر منځ د خبرو اترو درېیم پړاو د ترکیې په استانبول ښار کې پیل شو. دا خبرې داسې مهال پیلږي، چې د خیبر پښتونخوا په بنو کې د پولیسو او پاکستاني طالبانو ترمنځ دا مهال جګړه روانه ده.
د معلوماتو له مخې، په دې خبرو کې د طالب پلاوي مشري د طالبانو د استخباراتو مشر عبدالحق وثیق او د پاکستان له لوري د دغه هېواد د استخباراتو(ای ایس ای) مشر عاصم ملک پر غاړه لري.
د طالبانو له لوري په دې ناسته کې د کورنیو چارو وزارت اداري مرستیال رحمت الله نجیب، انس حقاني، د بهرنیو چارو وزارت ویاند عبدالقهار بلخي، د طالبانو د قطر دفتر سرپرست سهیل شاهین او د بهرنیو چارو وزارت د دوهم سیاسي ریاست رییس ذاکر جلالي هم ګډون لري.
سرچینې زیاتوي، په دې پړاو کې به دواړه لوري د تېرې ناستې د پرېکړو د پلي کولو څرنګوالي او د پاتې موضوعاتو په اړه خبرې وکړي. دا موضوعات د پاکستاني طالبانو تحریک( ټي ټي پي) د فعالیتونو او د داعش ډلې له ګواښونو سره تړاو لري.
په تېرو دریو اونیو کې د طالبانو او پاکستان تر منځ څو پړاوه خبرې اترې وشوې، خو تر اوسه کومه څرګنده پایله نه لري.
اسلاماباد طالبان د «ټي ټي پي» په ملاتړ تورنوي، خو طالبان دا ادعاوې ردوي او وایي چې دا مساله د پاکستان کورنۍ موضوع ده او دا هېواد غواړي چې د خپلو امنیتي ځواکونو ناکامۍ د افغان طالبانو پر غاړه واچوي.
دا په داسې حال کې ده چې د دواړو لوریو اړیکې د تېرو څو اونیو په اوږدو کې له جدي ترینګلتیا او نښتو سره مخ شوې دي.