د طالبانو د ټولګټو چارو وزارت خبر ورکړی، په تېره یوه اوونۍ کې د افغانستان د اوسپنې پټلۍ له لارې په ټولیز ډول ۱۳۵زره او ۴۸۷ مټریک ټنه انتقالات شوي چې پهکې تېل او نور سوداګریز توکي شامل دي.
د یاد وزارت د معلوماتو له مخې؛ له دې ډلې د حیرتان بندر له لارې ۹۷زره او ۳۹۶ ټنه، د اقینې بندر له لارې ۸ زره او ۵۷ ټنه، د تورغونډۍ له لارې ۱۸ زره او ۸۲۳ ټنه او د خواف–هرات له لارې ۱۱زره او ۲۱۱ ټنه توکي انتقال شوي دي.
په خبرپاڼه کې راغلي چې، په ټولیز ډول په دغه انتقالاتو کې واردات او صادرات دواړه شامل وو. د یاد وزارت په وینا؛ د تېرو اوو ورځو په ترڅ کې ۲۶۹ ټنه سوداګریز توکي چې لویه برخه یې د انارو جوس جوړوي، له هېواده بهر صادر شوي دي.
