د جنوبي افریقا چارواکي هغه «مرموزه الوتنه» څېړي چې له امله یې له ۱۵۰ زیات فلسطینیان د اسنادو پرته له غزې څخه دغه هیواد ته لېږدول شوي دي. دا الوتنه چې پنجشنبه د «او ار تامبو» نړیوال هوایي ډګر ته رسېدلې وه، مسافر یې نږدې ۱۲ ساعته د اسنادو نشتوالي له امله په الوتکه کې ساتل شوي وو.
د کډوالۍ د مرکو پر مهال څرګنده شوه چې دغو فلسطینیانو نه معلوم منزل درلود، نه د پاتې کېدو مشخص وخت، او نه هم د وتلو هغه اسناد چې معمولاً د اسراییلي چارواکو له خوا د غزې د پرېښودو پر مهال ورکول کېږي.
په الوتکه کې سختو شرایطو، د اوبو او خوړو د نشتوالي له امله د کورنیو، ماشومانو او ان د یوې نهو میاشتو امیندوارې مېرمنې د ساتلو پرېکړې پراخ غبرګونونه راوپارول.
د جنوبي افریقا ولسمشر سیریل رامافوسا وویل چې دغه کسان له غزې څخه د نایروبي له لارې دغه هېواد ته رسېدلي او باید د انسانیت له مخې ورسره مرسته وشي. د هغه په وینا، استخباراتي ادارې، د کورنیو چارو وزارت، او د بهرنیو چارووزارت د قضیې په څېړنه بوخت دي.
د فلسطین سفارت بیا ویلي چې دا الوتنه د یوې «نه ثبت شوې او دوکهکوونکې ادارې» له لوري تنظیم شوې چې د غزې له کړکیچ څخه یې ناوړه ګټه اخیستې او مسافر یې غلط پوه کړي دي. دغه سفارت یاده اداره تورنه کړې چې د ستونزو پر رامنځته کېدو یې له مسوولیت څخه تېښته کړې ده.
په همدې حال کې، یوه اسراییلي پوځي چارواکي اسوشیتډ پرېس ته ویلي چې «المجد» په نوم سازمان د دې الوتنې همغږي کړې وه. د هغه په وینا، اسراییلي ځواکونو د همدې سازمان په ترتیب شویو بسونو کې فلسطینیان د غزې له یوه ټاکل ځای څخه تر «کرمشالوم» پولې بدرګه کړي او وروسته بل بس د اسراییلو «رامون» هوایي ډګر ته لېږدولي دي.
د جنوبي افریقا چارواکو ویلي چې ۲۳ فلسطینیان نورو هېوادونو ته تللي، خو شاوخوا ۱۳۰ کسان د کورنیو چارو وزارت د مداخلې او د «هدیهکوونکو» په نوم د یوې خیریه ادارې د اسکان وړاندیز له تایید وروسته دې هېواد ته پرېښودل شوي دي.
