د طالبانو د ټولګټو وزارت وايي، چې په میدان وردګو ولایت کې د کابل ـ بامیانو دویمې لویې لارې اړوند د مرکز میدان ښار څخه تر جلریز ولسوالۍ پورې د ۲۵ کیلومتره سړک د اساسي او معیاري جوړونې پروژه د شاوخوا ۵۷۰ میلیونه افغانیو په لګښت پیل او په ۱۵ میاشتو کې به یې چارې بشپړې شي.
د طالبانو د ټولکټو وزارت نن شنبه، د لړم ۲۴مه په اېکس خواله رسنۍ د دغه وزارت د تخنیکې مرستیال عبدالکریم فاتح له قوله لیکلي، چې دا سړک د مرکز کابل او هرات ترمنځ یو سوداګریز دهلیز دی، چې په ۱۵ میاشتو کې به یې چارې بشپړې شي.
همداراز فاتح ویلي، چې دا لویه لار د طالبانو د مشرتابه د ځانګړي هدایت له مخې په اساسي او معیاري توګه رغول کېږي.
د طالبانو د میدان وردګو والي ملا خیرالله خیرخواه د قراردادي شرکت له مسوولینو غوښتي، چې له قرارداد سره سم په لوړ کیفیت او معیاري ډول دا پروژه پلې کړي.
هغه زیاته کړې، چې د طالبانو مشرتابه د هېواد د ابادۍ لپاره قوي اراده لري.
د یادونې وړ ده، طالبانو دا نه ده په ډاکه کړې، چې ددې لارې لګښت د داخلي بودېجې یا هم د کوم هېواد څخه مرسته شوي دي.
