د بنګلهدېش پلازمېنې ډاکه کې د جمعې په ورځ د ریکټر په کچه د ۵٫۷ درجې زلزلې له امله د مړو شمېر نهو او د ټپیانو شمېر څه باندې ۳۰۰ ته ورسېد. ځايي چارواکو په ټپیانو کې د ۹ کسانو روغتيايي حالت د اندېښنې وړ یاد کړی دی.
د بنګلهدېش چارواکو د جمعې په ورځ (د لړم ۳۰مه) تر زلزلې څو ساعته وروسته وویل، په دغې زلزله کې لږ تر لږه ۱۴ ودانۍ زیانمنې شوي او د برېښنا په یوه مرکز کې اورلګیدنه هم رامنځته شوې ده.
د بنګلهدېش د لنډمهاله حکومت مشر محمد یونس په یوه بیان کې د هېواد په بېلابېلو سیمو کې د دغې پېښې د قربانیانو له کورنیو سره خپله خواخوږي څرګنده کړې او زیاته کړې یې ده، چې حکومت ټولې لازمې چارې پیل کړې دي.
یونس وویل، حکومت وضعیت په دقت څاري او ټولو ادارو ته سپارښتنه شوې، چې د زیانمنو سیمو د ژغورنې عملیات لاپسې چټک کړي.
دغه زلزله د هند کلکته ښار کې هم احساس شوې، چې د زلزلې له مرکز څخه ۳۲۵ کیلومتره لرې دی. تر دې دمه په هند کې د مرګ ژوبلې یا زیان راپور نه دی ورکړل شوی.
د زلزلې مرکز د نارسېنګدي ښار ښودل شوی دی.
