طالبانو د کندهار پوهنتون تدریسي روغتون د ملا عمر په نامه نومولی

د پکتیا په مرکز ګردیز کې ددغه ولایت د ملي ټلوېزیون ځینو کارکوونکو د یکشنبې په ورځ، د لیندۍ ۲مه وویل، چې د طالبانو تر واک لاندې د پکتیا ملي ټلوېزیون ټولې خپرونې یوازې په غږیز ډول او د ساکښو له انځورونو پرته خپریږي.

د پکتیا ملي ټلوېزیون کې د نننۍ ورځې راپورونه هم یوازې په غږیزه بڼه خپاره شوي دي.

په ورته وخت کې د افغانستان د خبریالانو مرکز ادعا کړې، چې په پکتیا ولایت کې د واکمنې ادارې د ځایي چارواکو له لوري د ژونديو موجوداتو د انځورونو پر خپرولو د بندیز له اعلان وروسته، په پکتیا کې د ملي تلویزیون خپرونې درول شوې او یاده رسنۍ راډیو ته اوښتې ده.

پکتیا ۲۳ ولایت دی، چې یاد بندیز پکې په رسمي ډول اعلان او پلي کېږي.

د افغانستان د خبریالانو مرکز په خپله اعلامیه کې زیاته کړې، چې دغه بندیز د طالبانو د امر بالمعروف او نهی عن المنکر قانون د ۱۷مې مادې پر بنسټ پلي کېږي.

د ۱۴۰۳ کال په زمري میاشت کې د یاد بندیز د پلي کېدو د لړۍ له پیل راهیسې، تر دې دمه پر پکتیا سربېره په ۲۲ نورو ولایتونو کندهار، تخار، بادغیس، هلمند، ننګرهار، نورستان، فراه، نیمروز، بدخشان، بغلان، جوزجان، زابل، پروان، کندز، بامیان، دایکندي، فاریاب، پنجشیر، لغمان، سرپل، بلخ او هرات کې هم یاد بندیز په رسمي ډول اعلان او پلي شوی دی.

د جنرال مطیع الله خپلوانو د نوم نه ښودلو په شرط افغانستان انټرنشنل ته ویلي، چې په ارزګان کې د طالبانو امنیه قوماندانۍ د یاد ولایت د پخواني امنیه قوماندان جنرال مطیع الله درې زامن له تېرو دوو ورځو راهیسې بندیان کړي دي.

سرچینه وايي، طالبانو د جنرال مطیع الله پر کور له چاپې وهلو وروسته د وحیدالله، وارث او نوید په نوم د هغه درې زامن نیولي دي.

د جنرال مطیع الله د خپلوانو په وینا، طالبان له نیول شویو کسانو څخه د وسلو او مرمیو غوښتنه کوي.

د جنرال مطیع الله د خپلوانو د معلوماتو له مخې، یاد درې کسان وروسته له هغه بندیان شوي، چې د دوی په پخواني کور کې چې اوس یې په کرایه ورکړی دی، د پلټنې پرمهال مرمۍ پیدا شوې.

سرچینه وايي:«طالبانو څو ورځې مخکې د جنرال مطیع الله هغه کور چې بل کس ته یې په کرایه ورکړی و، تلاشي کړ، ځینې مرمۍ یې پیدا کړې، بیا يې د جنرال مطیع الله مشر زوی قوماندانۍ ته وغوښتی، هغه ورته ویلي و، چې دا کور کې خو کرایه نشین دی او دا مرمۍ موږ پسې اړه نه لري. طالبانو هغه ماښام ته بېرته خوشې کړ.»

د سرچینې د معلوماتو له مخې، طالبانو یوه ورځ وروسته د جنرال مطیع الله د زامنو پر کور چاپه ووهله، خو هلته یې له څه نه موندلو وروسته د مطیع الله درې زامن له ځان سره یووړل او بندیان یې کړل.

سرچینه وايي، یو شمیر قومي مشران د یادو کسانو د راخوشي کولو په موخه طالبانو ته د ضمانت ورکولو لپاره چمتو دي، خو طالبان وايي، چې یاد کسان د وسلو او مرمیو له زیرمو ښودلو وروسته خوشې کوي.

په ارزګان کې د طالبانو امنیه قوماندانۍ منلې چې په یو کور کې یې د مرمیو د پیدا کېدو په تړاو درې کسان نیولي او د یو شمېر نورو کسانو د نیولو په لټه کې دي.

جنرال مطیع الله د تېر جمهوري نظام پرمهال د ارزګان امنیه قوماندان و او د ۲۰۱۵ کال په مارچ میاشت کې په کابل کې په یوځانمرګي برید کې ووژل شو.

کایا کالاس د پاکستان د بهرنیو چارو وزیر اسحق ډار سره په ګډه اعلامیه کې وویل، چې د ډیورنډ کرښې پرسر ترینګلتیا او د طالبانو او پاکستان اړیکې یې څیړلې دي.

د اروپايي ټولنې په اعلامیه کې راغلي، چې دواړو لوریو د سیمې د سولې، ثبات او هوساینې لپاره خپلې ژمنې تکرار کړې او ټینګار یې وکړ چې د ګاونډیانو ترمنځ دې ستونزې په خبرو اترو اوارې شي.

د اعلامیې له مخې، دواړو له طالبانو وغوښتل چې د ترهګرۍ د له منځه وړلو لپاره رغنده رول ولوبوي.

هغوی د افغانستان د ټکني اقتصادي او ټولنیز وضعیت په اړه اندېښنه څرګنده کړې او د داسې یو خپلواک، باثباته او سوله‌ییز افغانستان ملاتړ یې کړی، چې په سیمه کې مثبت رول ولري.

دغه راز دواړو اړخونو د ملګرو ملتونو په مشرۍ د دوحې پروسې پر اساس د یو باوري سیاسي بهیر ملاتړ کړی او پر طالبانو یې غږ کړی، چې نړیوالې ژمنې پلې کړي.

په اعلامیه کې له افغان کډوالو د پاکستان د کوربه ستاینه شوې، خو ټینګار یې کړی، چې هر ډول بېرته ستنېدل باید خوندي، باعزته او د نړیوالو معیارونو مطابق وي.

دواړو لوریو د افغان ښځو، نجونو او زیان‌منو ټولنو د بشري حقونو د خونديتابه غوښتنه هم کړې ده.

د طالبانو د عامې روغتیا وزارت ویاند ډاکټر زمان شرافت ویلي، چې په کور دننه د درملو د تولید په برخه کې یې هڅې ګړنۍ کړې دي او د تولید او درملو د کیفیت پر برخه ډېر ټینګار کوي.

نوموړی وايي:«زموږ تولیدي اقلام ډېر شوې دي او نږدې ۶۰۰ ته رسیږي. د دې ترڅنګ ۱۳۰ فابریکې په داخل د هېواد کې درمل او طبي تجهیزات تولیدوي.»

د طالبانو د عامې روغتیا وزارت ویلي، چې د درملو د تولید یو شمېر کورنیو فابریکو نړیوال معیارونه پوره کړي دي او یاد وزارت ورته له هېواده بهر د درملو د لېږد سند هم ورکړی دی.

د یاد وزارت ویاند زیاته کړې، چې په هېواد کې د تولیدي درملو د ملاتړ په موخه یې افغانستان ته د بهرنیو درملو د قاچاق مخه کلکه نیولې ده.

د طالبانو د عامې روغتیا وزارت پرداسې مهال په افغانستان کې د درملو د تولید د ودې خبر ورکړی، چې څه موده وړاندې د یادې ډلې د مالیې وزارت په یوه اعلامیه کې تر راتلونکو درېیو میاشتو له پاکستان نه واردېددونکو درملو د محصول خبر ورکړی و.

طالبانو له پاکستان نه د درملو واردوونکو څخه غوښتنه کړې وه، چې په درېیو میاشتو کې خپل حسابونه تصفیه کړي او د بدیلو وارداتي لارو کارونې ته تیاری ونیسي.

د طالبانو د ادارې مرستیال ویاند محمد الله فطرت وايي، چې ددې ډلې د رياست الوزرا اداري مرستيال عبدالسلام حنفي نن د امر بالمعروف، نهې عن المنکر او شکايتونو اورېدلو وزارت له لوري د معروفاتو د اقامې او د منکراتو د مخنيوي په تړاو د همغږۍ جوړه شوې غونډه کې وویل، چې په يوه اسلامي ټولنه کې د معروفاتو اقامه، د منکراتو مخنيوی او د شکايتونو اورېدل ځانګړی اهميت لري او د اسلامي نظام له اساسي اهدافو څخه ګڼل کېږي.

نوموړي د خپلې ادارې د امر بالمعروف، نهی عن المنکر او شکايتونو اورېدلو وزارت مسوولينو ته په خطاب کې ویلي، « ستاسو په اوږو دروند مسووليت پروت دی او د معروفاتو د اقامې او د منکراتو مخنيوي په موخه لا زياته هڅه او له خلکو سره نېک چلند وکړئ».

حنفي له ګاونډيو هيوادونو څخه د افغان کډوالو د ستنېدو مسالې ته په اشارې ویلي، ټول کډوال د خپل دين، ناموس او حیثیت د ساتنې لپاره ګاونډيو هيوادونو ته تللي، خو متاسفانه نن د قانوني اسنادو لرلو باوجود اخراجېږي.