د اروپايي ټولنې د بهرنیو چارو اړیکو استازې او د کمېسیون مرستیالې کایا کالاس د اروپايي ټولنې او پاکستان د ستراتیژیکو خبرو اترو په اووم ډیالوګ ګې د پاکستان او افغانستان ترمنځ پر خبرو اترو ټینګار کړی او پر طالبانو یې غږ کړی، چې ددوحې پروسې پر بنسټ نړیوالې ژمنې عملي کړي.
کایا کالاس د پاکستان د بهرنیو چارو وزیر اسحق ډار سره په ګډه اعلامیه کې وویل، چې د ډیورنډ کرښې پرسر ترینګلتیا او د طالبانو او پاکستان اړیکې یې څیړلې دي.
د اروپايي ټولنې په اعلامیه کې راغلي، چې دواړو لوریو د سیمې د سولې، ثبات او هوساینې لپاره خپلې ژمنې تکرار کړې او ټینګار یې وکړ چې د ګاونډیانو ترمنځ دې ستونزې په خبرو اترو اوارې شي.
د اعلامیې له مخې، دواړو له طالبانو وغوښتل چې د ترهګرۍ د له منځه وړلو لپاره رغنده رول ولوبوي.
هغوی د افغانستان د ټکني اقتصادي او ټولنیز وضعیت په اړه اندېښنه څرګنده کړې او د داسې یو خپلواک، باثباته او سولهییز افغانستان ملاتړ یې کړی، چې په سیمه کې مثبت رول ولري.
دغه راز دواړو اړخونو د ملګرو ملتونو په مشرۍ د دوحې پروسې پر اساس د یو باوري سیاسي بهیر ملاتړ کړی او پر طالبانو یې غږ کړی، چې نړیوالې ژمنې پلې کړي.
په اعلامیه کې له افغان کډوالو د پاکستان د کوربه ستاینه شوې، خو ټینګار یې کړی، چې هر ډول بېرته ستنېدل باید خوندي، باعزته او د نړیوالو معیارونو مطابق وي.
دواړو لوریو د افغان ښځو، نجونو او زیانمنو ټولنو د بشري حقونو د خونديتابه غوښتنه هم کړې ده.
