د پاکستان او ایران ځانګړو استازو د افغانستان په تړاو خبرې وکړې
د افغانستان لپاره د پاکستان ځانګړي استازي محمد صادق ویلي، چې د افغانستان په چارو کې د ایران له ځانګړي استازي سره یې کتلي او دواړو لوریو د سیمې د وضعیت او اندېښنو په اړه خبرې کړې دي.
د افغانستان لپاره د پاکستان ځانګړي استازي محمد صادق ویلي، چې د افغانستان په چارو کې د ایران له ځانګړي استازي سره یې کتلي او دواړو لوریو د سیمې د وضعیت او اندېښنو په اړه خبرې کړې دي.
محمد صادق نن د چارشنبې په ورځ، د لیندۍ ۵مه پر خپل اېکس لیکلي، چې د افغانستان په چارو کې د ایران له ځانګړي استازي محمد رضا بهرامي او ورسره مل پلاوي سره یې کتلي دي.
نوموړي ویلي، چې د یادې لیدنې په ترڅ کې یې د سیمې د وضعیت او دده په وینا، د افغانستان له خاورې د ترهګریزو ډلو فعالیتونو په اړه خبرې کړې دي.
صادق خان ویلي، چې پاکستان له ایران او نورو سیمه ييزو ملګرو سره د ګډو امنیتي ننګونو د حل په موخه پر ګډو هڅو او همکاریو ټینګار کوي او په سیمه کې د سولې او ثبات د هڅو ملاتړ ته ژمن دی.
دا په داسې حال کې ده، چې ایران ویلي پر یوه سیمه ییز چوکاټ کار کوي، چې د طالبانو او پاکستان ترمنځ پر اوسني وضعیت پکې بحث وشي او په سیمه کې ثبات ټینګ شي.
