اشرف غني: د افغانستان له تجزیې او پاشل کېدو اندېښنه لرم

پخواني ولسمشر محمد اشرف غني د پنجشنبې په ورځ په یوه اعلامیه کې، چې د نوموړي پر ټولنیزو اکاونټونو خپره شوې، پر افغانستان د پاکستان هوايي بریدونو ته غبرګون ښودلی.

اشرف غني ویلي، چې افغانستان له څو لسیزو راهیسې د ډیورنډ کرښې له ها غاړې څخه د یوې نا اعلان شوې جګړې هدف و او یادې جګړې د کرښې په دواړو غاړو کې مېشتو خلکو ته سخت زیان اړولی دی.

پخواني ولسشمر ویلي، چې د پاکستان د پوځي بریدونو تر څنګ د افغانستان په ادرس د پاکستان له خوا د سیاسي بدلونونو راوستلو اشارې هم ور رسیدلې دي. نوموړي ویلي، چې د افغانستان په راتلونکي برخلیک کې د پردیو هر ډول مستقیم او غیرمستقیم رول او لاسوهنه ناروا ده.

غني زیاته کړې:«افغانان باید خپله دا فرصت او امکان ومومي چې د یوې لازمي اجماع له لارې د خپلې راتلونکې پرېکړه چې مشروعیت او ولسي مقبولیت، د ښځو او سړیو د حقونو او ازادیو تامین او له نړۍ سره مشروع تعامل ته لاره پرانیزي، پخپله وکړي».

هغه زیاته کړې، چې« نور باید وپوهېږي چې افغانان که په نورو خبرو کې اختلاف لري، دلته یې نظرونه اتفاق ته نژدې سره ورته دي او همدا افغانان له غیر افغانانو بېلوي.»

نوموړي د افغانانو ترمنځ پر یووالي ټینګار کړی او ویلي یې دې چې نور باید د افغانانو په لاس افغان وژنې او ینې توییدنې ته باید لاره جوړه نه شي.

اشرف غني ویلي:« دلته د افغان له خوا د افغان د وینې تویېدنې مخنیوی باید زموږ په لومړیتوب کې وي. زما اندېښنه دا ده، چې د افغانانو د وینې تویولو یوه بله پروژره چې په پایله کې به خدای مه کړه، د افغانستان د تجزيي او پاشل کېدو لامل شي، د ځینو کسانو له خوا تر لاس لاندې نیول شوې . اوس موږ یو ډېر سخت انتخاب ته رسېدلي یو، چې موږ د یو بل په منلو سره په رښتیا سره خپل ځان د اسیا په څلور لارې بدلوو او که له بده مرغه یو ځل بیا د نورو لپاره د نیابتي جګړې ډګر جوړیږي.»

اشرف غني ویلي، د ترهګرۍ موضوع باید افغانستان، پاکستان د سیمې په ګده اجماع سره یو نوی تعریف او چوکاټ ومومي او د هغه له مخې ورسره چلند وشي.

غني ویلي، چې اوسني موضوعات په موقتي موافقو او اوربند نه حلیږي او اوسنی تګلوری د وخیمو عواقبو خواته ځي.