د افغانستان لپاره د پاکستان پخواني ځانګړي استازي اصف دراني ویلي، چې د افغانستان له خاوري په تاجکستان کې پر چینايي وګړو د ډرون څرخکې په برید کې د درېیو چینایانو وژل د دې ښکاره ثبوت دی، چې افغانستان د ترهګرۍ په مرکز بدلېږي.
نوموړي ویلي، چې د نړیوالې ټولنې او په ځانګړې توګه د افغانستان نږدې ګاونډیان لپاره د بیړنۍ اقدام اړتیا ده.
دا په داسې حال کې ده، چې د تاجکستان د بهرنیو چارو وزارت تېره ورځ وویل، چې د افغانستان له خاورې په یوه برید کې د «شاهین ایساېم» د سرو زرو د استخراج شرکت درې چینایي کارکوونکي وژل شوي دي. تاجکستان ویلي، چې د افغانستان په خاوره کې جنایتکارې ډلې لا هم د سرحدي وضعیت د ګډوډولو هڅې کوي.
دغه وزارت په یوې اعلامیه کې ویلي و، چې دا برید د چهارشنیې په شپه د افغانستان له پولې د شمسالدین شاهین ولسوالۍ په پوله کې د یاد شرکت د کارکوونکو پر استوګنځي شوی دی.
د پاکستان په ګډون د سیمې هېوادونو یاد برید غندلی دی.
په ورته مهال د طالبانو د بهرنیو چارو وزارت نن جمعې په ورځ، د لېندۍ ۷مه د تاجکستان د ختلان ولایت په شمس الدین شاهین سیمه کې د درېیو چینایي وګړو وژنه غندلې ده. دغه وزارت وايي، د پېښې د عواملو موندلو په موخه له تاجکستان سره د معلوماتو تبادلې، تخنیکي همکارۍ او ګډې ارزونې ته بشپړ چمتووالی لري.
