د طالبانو د ټرانسپورت او هوايي چلند وزارت د جي پي اېس وسایلو د نصبولو لپاره له شپږو شرکتونو سره یو تړون لاسلیک کړ. د دې تړون له مخې، به دا شرکتونه په ټول هیواد کې په مسافر وړونکو او بار وړونکو موټرو کې د تعقیب وسایل(جي پي ایس) نصب کړي.
د طالبانو تر واک لاندې د ترانسپورت او هوايي چلند وزارت نن شنبه، د لیندۍ ۸مه په اېکس خواله رسنۍ لیکلي، چې د یاد وزارت د ځمکني ترانسپورت مرستیال عبدالسلام حیدري په شتون کې، د مسافرو او بار وړونکو موټرو لپاره د تعقیب وسایلو (جي پي اېس) نصبولو لپاره له شپږو شرکتونو سره یو تړون لاسلیک کړ.
د دې تړون له مخې به دا شرکتونه په ټول هیواد کې مسافر وړونکو او بار وړونکو موټرو کې د تعقیب وسایل نصب کړي او پدې برخه کې به ټولې اړینې اسانتیاوې چمتو کړي، کوم چې به د ترانسپورتي موټرو د معیاري کولو او ښه مدیریت کې کلیدي رول ولوبوي.
دا تړون په داسې حال کې ترسره کېږي، چې افغانستان خونړیو ټکرونو شاهد دی.
د روغتیا نړۍوال سازمان راپور ښيي، چې هر کال ۱.۳۵ میلیونه کسان د ټرافیکي پېښو له امله ژوند له لاسه ورکوي.
