د اېډز نړۍوال سازمان د اېډز ناروغۍ د نړۍوالې ورځې په درشل کې په خپل تازه راپور کې خبرداری ورکړی، چې د نړۍوالو بسپنهورکوونکو د مرستو کمښت د اېډز پر ضد د مبارزې لپاره نړۍوالې هڅې له لوی ناورین سره مخ کړي.
دغه راپور چې نن یکشنبه ( د لیندۍ ۹مه) خپور شوی ښيي، چې د بودیجې کموالی، د مخنیوي خدمتونه او د ټولنې پر بنسټ پروګرامونه په ځانګړي ډول په ټیټ عاید لرونکو هېوادونو کې خلک سخت اغېزمن کړي او میلیونونه کسان یې له ګواښ سره مخامخ کړي دي.
یاد سازمان وايي، چې د اېډز د مخنیوي خدمات په جدي ډول ګډوډ شوي او د همجنسبازانو او هغو کسانو لپاره چې نشه یي توکي کاروي او روغتیايي خدماتو ته لاسرسی نه لري، یاد بحران لا پسې زیات کړی دی.
له دې ننګونو سره سره راپور ټینګار کوي، چې سیاسي رهبري، نړۍوالې همکارۍ، دوامداره پانګونه او د قانوني او ټولنیزو خنډونو لرې کولو له لارې لا هم ممکنه ده، چې د ۲۰۳۰کال تر پایه د اېډز پای ته رسېدل ممکن شي.
د اېډز نړۍوال سازمان له نړۍوالې ټولنې غوښتنه کړې، چې د مالي تشې ډکولو لپاره جدي ګامونه واخلي او د شاتګ پر ځای د بدلون لاره غوره کړي. د دغه سازمان په وینا، یوازې د بېړني عمل، یووالي او ګډ تعهد په وسیله اېډز د عامې روغتیا پر وړاندې د یو ګواښ په توګه له منځه تللی شي.
