د طالبانو د امر بالمعروف وزارت ویاند سیفالاسلام خیبر ویلي، چې د فاریاب ولایت په میمنې ښار کې د یادې ډلې پر امر بالمعروف ریاست د یوه برید هڅه شنډه شوې ده. هغه ویلي، بریدکوونکي تېر ماښام غوښتل د دوی امر بالمعروف ریاست کارکوونکي په نښه کړي؛ خو موخې ته تر رسېدو دمخه نیول شوی دی.
هغه پر اېکس پاڼه د بریدګر په اړه نور جزییات نهدي ورکړي او نه یې هم څرګنده کړې، چې د دغه برید مخه څنګه نیول شوې ده. تر دې وړاندې د ازادۍ جبهې په نوم وسلهوالې ډلې په بېلابېلو ولایتونو کې د طالبانو د امر بالمعروف پر کارکوونکو د خپلو بریدونو خبر ورکړی و.
تېره شپه یو شمېر رسنیو او د خواله شبکو کاروونکو راپور ورکړ، چې په میمنې ښار کې د طالبانو د امر بالمعروف ریاست دروازې مخې ته یوه چاودنه شوې ده. طالبان اکثره وخت د خپلو وسلهوالو مخالفانو بریدونه ردوي او یا پرې چوپ پاتې کېږي. د یادې ډلې مشران تل ادعا کوي، چې په ټول افغانستان کې امنیت ټینګ دی.
