په خوست کې د طالبانو د والي ویاند مستغفر ګربز ویلي، چې د «قصاص» شوي کس د دوو زامنو د اعدام حکم هم صادر شوی دی. نوموړي زیاته کړې، چې د مقتول د کورنۍ د وارثانو د نشتون له امله د اعدام تطبیق ځنډول شوی دی.
د خوست د والي ویاند همداراز زیاته کړې، چې په دغه ولایت کې نن قصاص شوی کس منګل نومېده، چې شاواخوا لس میاشتې وړاندې د یاد ولایت د علیشرو او ترېزیو ولسوالۍ اړوند په بوخانه سیمه کې یې د خپلو دوو زامنو په ملتیا د یوې کورنۍ دیارلس غړي وژلي.
ګربز ویلي، چې د منګل د دوو زامنو لپاره هم د قصاص حکم صادر شوی خو د مقتولینو د وارثانو د نشتون له امله د منګل د دوو زامنو د قصاص تطبیق ځندول شوی دی.
مستغفر ګربز ویلي: «که د مقتولینو وارثان نن موجود وای، د منګل په څېر به یې پر زامنو هم د قصاص حکم پلی شوی وای.»
دا په داسې حال کې ده، چې طالبانو نن سې شنبه د خوست په یوه ورزشي لوبغالي کې د منګل په نوم یو کس په عام محضر کې قصاص کړ.
د خوست د والي ویاند ویلي، چې د قصاص د نندارې لپاره شاوخوا ۸۰ زره کسان راټول شوي وو.
په ورته مهال بیا د طالبانو له خوا په عام مضر کې د ننني اعدام موضوع ته د بشري حقونو د ملاتړ ګڼو بسټونو سخت غبرګون ښودلی دی.
