د طالبانو او پاکستان مرکچي پلاويو د سعودي عربستان په خبرو اترو کې د اوربند پر دوام هوکړه کړې ده. دواړو خواوو د تېرو خبرو اترو د پرېکړو پر دوام موافقه ښودلې، چې اوربند به جاري ساتي. طالبانو ویلي، چې دوی د مثبتې نتیجې لپاره د نورو ناستو لپاره هم چمتو دي.
د سعودي عربستان په پلازمېنه ریاض کې د طالبانو او پاکستان د مرکچي پلاوي له خبرو اترو وروسته د دواړو هېوادونو د پوځونو ترمنځ اوربند غځېدلی دی.
په دغو خبرو اترو کې ښکیلو درې افغان او دوو پاکستاني چارواکو، چې یو یې په استانبول کې مېشت دی رویټرز ته ویلي، چې دواړو لوریو د اوربند پر دوام سلا کړې ده.
د پاکستان د بهرنیو چارو وزارت، پوځ او د افغان طالبانو ویاند او د سعودي حکومت د رویټرز پوښتنو ته ځواب نه دی ویلی.
یوه لوړپوړي طالب چارواکي وویل چې دا خبرې د سعودي په نوښت ترسره شوې او زیاته یې کړه: «موږ چمتو یو چې د مثبتې نتیجې لپاره نورو غونډو ته هم لاړ شو».
پاکستاني چارواکو وویل چې د پوځ، استخباراتو او بهرنیو چارو وزارت استازو په دې خبرو کې د اسلاماباد استازیتوب کاوه.
اسلاماباد ادعا کوي چې په افغانستان کې مېشت وسلهوال په پاکستان کې بریدونه کوي او کابل د هغوی پر ضد د اقدام لپاره د پاکستان پرلهپسې غوښتنو ته ځواب نه دی ویلی. طالبان بیا دا تورونه ردوي او وايي چې پاکستاني جنګیالي افغان خاوره نه کاروي.
پاکستاني چارواکو ویلي چې په وروستیو بریدونو کې ځانمرګي بریدګر، چې یو یې په اسلاماباد کې ۱۲ کسان ووژل، د افغان اتباعو په توګه پېژندل شوي دي، خو ددې لپاره یې کره شواهد نه دي وړاندې کړي.
په کابل کې د طالبانو یوې سرچینې تېره ورځ افغانستان انټرنشنل ته وویل، چې په دې خبرو اترو کې له پاکستان سره د لارو د خلاصون په تړاو ددوی استازو کوم وړاندیز نه دی کړی، خو پاکستاني چارواکو ددغه هېواد رسنیو ته ویلي، چې دا وړاندیز سعودي عربستان کړی و، خو اسلام اباد نه دی منلی.
