د طالبانو د کورنیو چارو وزارت ویاند عبدالمتین قانع وايي، چې د ایران د سرحدي ځواکونو له لوري د ۱۱ افغانانو د وژلو پیښې د څېړلو په موخه یاد هېواد ته طالب پلاوی لېږي. نوموړی وايي، چې د لاس شته شواهدو او اسنادو په مټ به یاده پېښه وڅیړي.
عبدالمتین قانع ویلي، چې یاد افغانان څه باندې شل ورځې وړاندې له ایران سره پر پوله د ایراني ځواکونو په ډزو کې وژل شوې او جسدونه یې افغانستان ته را انتقال شوي او د قربانیانو کورنیو ته سپارل شوي دي.
د فراه ولایت امنیه قوماندانۍ تېره ورځ خبر ورکړی و، چې لږ تر لږه ۱۰ افغان کډوال د ایران د پوله ساتو ځواکونو په ډزو کې ووژل شوي دي.
دغو کسانو غوښتل چې د فراه د شیخ ابونصر بندر له لارې په «غیرقانوني» توګه ایران ته ننوځي، خو د ډزو هدف ګرځېدلي.
