د طالبانو د اطلاعاتو او کلتور وزارت، ۴۲ لرغونې سکې چې له ډلې یې یوه د سپینو زرو او پاتې نورې له مسو څخه جوړې شوې دي او د تېرو کلونو په لړ کې د ننګرهار ولایت سبز اباد غونډۍ لرغونې سیمې څخه لاسته راغلې دي د ننګرهار ولایت موزیم ته وسپارل شوې.
د طالبانو د اطلاعاتو او کلتور وزارت نن شنبه، لیندۍ ۱۵مه د یوې اعلامیې په خپرولو سره ویلي، چې د مسلکي پلاوي له لوري نندارې ته وړاندې کولو په موخه له پاک کارۍ، وقایې، تشخیص او ثبت وروسته د ننګرهار ولایت موزیم ته ولېږدول شوې.
د طالبانو په اعلامیه کې لیکل شوي، چې یادې سکې د میلاد څخه وړاندې درېیمې پېړۍ څخه تر شپږمې میلادي پېړۍ «هندو سکایي، یوناني او باختري، هندي او پارتي، کوشاني او ساساني دورو» پورې تړاو لري.
د طالبانو د اطلاعاتو او کلتور وزات د لرغون پېژندنې رییس سید ذبیح الله سادات وویل:«لرغونې آثار په ځانګړې توګه سکې د حکومت او خلکو تاریخي، سیاسي، فرهنګي، اقتصادي او د ټولنیز هویت نښه ده، چې له پخوانیو دورو څخه موږ ته پاتې شوي دي.»
دوی زیاتوي. چې لرغون پېژندنې ریاست مسلکي کارکوونکي د اصولو او تګلارو مطابق علمي او مسلکي فعالیتونو ته ژمن دي، ترڅو د هېواد د بډایه تمدن د لا ښې پېژندنې غوره زمینه برابره کړي.
