د خیبر پښتونخوا په کورمه ولسوالۍ کې د طالبانو په بریدونو کې ۶پاکستاني پوځیان وژل شوي او ۴ نور ټپیان دي. محلي سرچینې وايي، دغه پوځیان پر طالبانو د چاپې پرمهال وژل شوي. په بریدونو کې د پاکستاني طالبانو یو محلي قوماندان او پنځه جنګیالي هم وژل شوي دي.
په ورته وخت کې پاکستاني رسنیو ویلي، چې په لکي مروت کې د پاکستان امنیتي ځواکونو د طالبانو پر یوه پټنځای ډرون برید کړی، چې د حافظ ګل بهادر د ډلې اووه کسان او یو محلي قوماندان هم پکې وژل شوي دي.
پاکستاني طالبانو ددغو بریدونو په اړه څه نه دي ویلي.
د پښتون ژغورنې غورځنګ مشر منظور احمد پښتین د افغانستان انټرنشنل - پښتو په فرهنګي سپړنه کې ویلي، چې "پنجابي استعمار" یوازې د لر پښتنو دوښمن نه دی، بلکې تل یې د بر پښتنو او افغانانو پروړاندې هم دوښمني کړې ده. نوموړي پر افغانانو غږ کړی، چې خپل اصلي دوښمنان وپېژني.
پښتین د پښتنو پر جرګې ټینګار وکړ او ویې ویل، چې پخوا به جرګې په ځانګړو حالاتو کې کېدې، خو په اوس وخت کې افغان ملت وېشل شوی دی.
منظور پښتین همدارنګه زیاتوي: «افغان ملت له یو بل څخه بېباوره شوی دی او په داسې حالاتو کې د ولسونو راټولول او په ګډه ناسته د اعتماد فضا رامنځته کوي.»
د پښتون ژغورنې غورځنګ مشر وايي، چې د پښتنو دوښمن هڅه کړې ده چې پښتانه وځپي، په پښتنو سیمو کې پوځي عملیات وکړي او پښتانه لا سره ووېشي.
د هغه په خبره، په کوزه پښتونخوا کې د پاکستان پوځ نه غواړي رښتیني قومپاله کسان راټول شي او د خپل وطن لپاره غږ پورته کړي.
پښتین وايي: «د تیراه د پېښې غږ پنجابي پوځ په توپونو او عملیاتو بند کړ، مګر په لندن کې یو شمېر پښتنو دا غږ پورته کړ.»
هغه زیاتوي، چې د پاکستان پوځ په پښتونخوا او افغانستان کې بمبار کوي او د هغوی لپاره ټول پښتانه یو ډول دي.
پښتین وویل: «زموږ دوښمن چې د عیش او عشرت په خاطر متحد پاتې کېدای شي، نو موږ افغانان څنګه د خپلو کورنیو، اولادونو او ژوند لپاره سره نه شو راټولېدلی.»
د پښتون ژغورنې غورځنګ مشر دغه راز وایي، چې د پښتون ژغورنې غورځنګ غړي په پنجاب، سند او یو شمېر نورو زندانونو کې پراته دي او اړتیا ده، چې افغان ملت نور غلی پاتې نه شي.
هغه له پښتنو ګیله وکړه: «باور وکړئ چې په باجوړ کې ماشومان او ښځې شهیدانې کړي بل هېڅ پښتون پرې نه راپورته کېږي، ولې دومره تقسیم یو؟ ولې دا ملت موږ خپل نه شمارو؟ »
نوموړی وايي، چې پښتانه ملي مبارزه وقفهيي کوي خو دا مبارزه وقفهيي بېپایلې ده او اړتیا ده چې مبارزه دایمي او هره ورځ وشي.
هغه زیاتوي: «فرهنګي خلک باید د ملي یووالي لپاره ویډیويي پیغامونه زیات کړي او تسلسل مراعت کړي.»
د یادونې وړ ده، چې دا مهال منظور پښتین د پاکستان د پوځ له ګواښونو په یوه نامعلوم ځای کې پناه اخیستې او وخت ناوخت خپلو څارونکو ته پیغامونه ورکوي.
د افغانستان او پاکستان د سوداګرۍ ګډه خونه وايي، د لارو د تړل کېدو له امله شاوخوا ۱۱ زره افغان ټرانزیټي کانټینر د کراچۍ په بندر کې بند پاتې دي. پاکستاني سوداګرو ویلي، چې له افغانستان سره د لارو بندېدو د پاکستان د صادراتو ونډه پام وړ کمه کړې ده.
پاکستاني سوداګر وايي چې اوسني وضعیت د پاکستان او افغانستان ترمنځ د دوه اړخیزې سوداګرۍ حجم پام وړ کم کړی دی او د کرښې په تړل کېدو سره د پاکستان د صادراتو ونډه هم پام وړ کمه شوې ده.
د پاکستان د سوداګرۍ او صنایعو خونې مشر جنید الطاف بزنیس رېکاډر ته وویل چې د پاکستان او افغانستان ترمنځ د ګډې سوداګرۍ او ترانزیت سوداګرۍ ځنډول د دواړو هیوادونو اقتصاد ته زیان رسوي او اړتیا ده چې بیاکتنه وشي او ټولې ستونزې د خبرو اترو په میز حل شي.
هغه وویل چې د لارو تړل کیدو راهیسې ګډې سوداګرۍ ته شاوخوا ۴۵ میلیون ډالره زیان اوښتی دی.
د سرحد د سوداګرۍ او صنایعو خونې مشر له سوداګرۍ څخه د سیاست پر جلا کولو ټینګار کړی او وايي چې د دواړو ګاونډیو هیوادونو ترمنځ د سوداګرۍ بیا پیلولو لپاره باید سملاسي خبرې اترې پیل شي.
مخکې له دې پاکستاني سوداګرو ویلي و، چې په تیرو دوو میاشتو کې له افغانستان سره د سوداګریزو لارو تړلو دوی ته په ورځ کې له ۴ میلیون ډالرو څخه ډیر زیان رسولی دی.
دوی خبرداری ورکړی، چې پاکستان به په دې چلند سره په افغانستان او مرکزي اسیا کې بازارونه په چټکۍ سره له لاسه ورکړي.
د برېتانیا په لندن ښار کې د خېبر قامي جرګې په تسلسل او د پرېکړو په ملاتړ یې د یکشنبې په مازدیګر (د لیندۍ ۱۶مه) د پښتون ژغورنې غورځنګ غونډه پیل شوه. د دغې جرګې سمبالوونکي وايي، په دغې غونډه کې پر پښتونخوا د پاکستان او په ځانګړې توګه د پاکستان د پوځ د «جنایتونو» په تړاو خبرې وشوې.
په دې غونډه کې ویناوالو د خېبر تاریخي جرګې له پرېکړو پر ملاتړ ټینګار وکړ او همداراز یې څرګنده کړه، چې د پاکستان د پوځ له لوري پر پښتنو د روان ظلم تصویر باید نړۍوالو ستېجونو ته وړاندې شي.
د دغې غونډې ویناوالو همداراز په پښتونخوا کې د پاکستاني پوځ پر عملیاتو له نیوکو سربېره په یاده سیمه کې د هر ډول عملیاتو د درېدو غوښتنه وکړه او همداراز یې د پاکستاني پوځ له لوري د پښتون ژغورنې غورځنګ د غړو پر نیونو نیوکه او د بندي غړو د ازادېدو غوښتنه وکړه.
دوی همداراز د پاکستان له لوري د پښتون ژغورنې غورځنګ پر فعالیتونو د بندیز لګېدل هم په کلکه وغندل.
په دې غونډه کې په افغانستان کې د افغان نجونو او ښځو د زدهکړو او کار پر بندیز له نیوکو سربېره له طالب چارواکو وغوښتل شول، چې نجونو زدهکوونکو ته د زدهکړو د دوام او همداراز د کار اجازه ورکړي.
د خیبر پښتونخوا اعلی وزیر سهیل اپریدي د یکشنبې په ورځ په یوه ولسي غونډه کې د پاکستان د پوځ او مرکزي حکومت پر امنیتي تګلارو نیوکې وکړې او ویې ویل چې ۲۱ کاله د پښتو وینې توییږي، خو بیا هم ترهګري له منځه نه ځي او باید پالیسۍ بدلې شي.
اپریدي د تحریک انصاف د پلویانو په یوه ستره غونډه کې وویل: « تاسې یوه پرېکړه په بلې پسې کوئ او په عملیات پسې عملیات روان دي. که نن هم ترهګري موجوده وي، نو ستاسې پالیسي ناکامه ده. باید پالیسي بدله کړئ».
نوموړي زیاته کړه چې پښتنو د پاکستان لپاره زرګونه قربانۍ ورکړې دي او د اوسني وضعیت مسوول نه دي.
د ده په وینا، که د تېرو ۲۱ کلونو تګلارې د امنیت په برخه کې پایله نه وي ورکړې، نو بدلون یې په کار دی.
اپریدي د سیاسي وضعیت په اړه هم وویل چې په ایالت کې یې د حکومت موجودیت د خلکو اعتماد ښيي او «خلک عمران خان ته درېیم ځل رایه ورکوي».
نوموړي په خپله وینا کې څو پښتو شعرونه هم وویل،«چې پښتنو سترګو کې رعب راشي، غیر کې به هله سړیتوب راشي، تڼۍ تڼۍ به دې ګریوان ووینې- چې دا زلمي په لېونتوب راشي».
په سپین بولدک کې د طالبانو او پاکستاني سرحدي ساتونکو ترمنځ له نښتې سره هم مهاله د پاکستان پوځ د خیبر پښتونخوا په ټانک او لکی مروت سیمو کې د نهو وسله والو د وژلو اعلان کړی. د پاکستان پوځ ویلي چې د وسله والو ځینې وسلې او مهمات هم لاسته ورغلي دی.
د پاکستان د پوځ د عامه اړیکو دفتر نن شنبه، د لیندۍ ۱۵مه په یوه مطبوعاتي اعلامیه کې وویل چې دا کسان تېره ورځ د افغانستان سره پر ډیورنډ کرښه په دوو جلا عملیاتو کې وژل شوي.
د پاکستان د پوځ په رسمي مطبوعاتي اعلامیه کې وژل شوي وسله وال "د هند سره تړلي فتنه الخوارج" بلل شوي، دا هغه اصطلاح ده چې پوځ یې د تحریک طالبان پاکستان غړو ته کاروي.
تر اوسه پورې تحریک طالبان پاکستان د پوځ مطبوعاتي اعلامیې ته ځواب نه دی ویلی.
د پاکستان د پوځ په وینا، اووه وسله وال په ټانک ولسوالۍ کې او دوه نور د خیبر پښتونخوا په لکی مروت سیمه کې د امنیتي ځواکونو سره په نښتو کې ووژل شول.
پاکستاني پوځ هغه کسان چې وژل شوي دي د ملکي وګړو په هدفي وژنو او د امنیتي ځواکونو په وړاندې "ترهګریزو فعالیتونو" کې په لاس لرلو تورن کړل.