د خبریالانو د خوندیتوب کمېټه وایي، د ۲۰۲۵ کال پای ته رسېدو ته ۳ اوونۍ پاتې دي او تر دې مهاله په نړۍ کې د وژل شویو خبریالانو شمېر د ۲۰۲۴ کال د ریکارډ سره برابر شوی دی. دوی زیاته کړې، په غزه کې د اسراییل بریدونو او ایران او یمن کې د خبریالانو وژنې د وژل شویو خبریالانو شمېر لوړ کړی.
د خبریالانو د خوندیتوب کمېټې د چهارشنبې په ورځ (د لیندۍ ۱۹مه) په یوه راپور کې ویلي، چې د غزې په تړانګه کې پر خبریالانو د اسراییل بریدونو، په ایران او یمن کې وژنې په ۲۰۲۵ کال کې د وژل شویو خبریالانو شمېره لوړه کړې او تر دې مهال ۱۲۶ خبریالان او د رسنیو کارمندان وژل شوي دي.
د کمېټې د معلوماتو له مخې، د دې ترڅنګ په سوډان، مکسیکو، اوکراین او فليپين کې هم سږکال خبریالان وژل شوي دي.
په خبرپاڼه کې د نړۍوالې بېثباتی پر زیاتېدو اندېښنه ښودل شوې او کره معلوماتو ته لاسرسی مهم یاد شوی دی.
د خبریالانو د خوندیتوب د کمېټې مشر جوډي ګینزبرګ ویلي: «په ډېرو پېښو کې د خبریالانو د وژونو مسوول کسان نه مجازات کېږي، د وژنو بل ریکارډ کال ښيي، چې نړۍواله ټولنه د رسنیو پر وړاندې د بریدونو د مخنيوي لپاره د اړتیا وړ کار نه دی کړی.»
په خبرپاڼه کې ویل شوي، چې په ۲۰۲۳ کال کې د اسراییل او غزې د جګړې د پیلېدو راهیسي نږدې ۲۵۰ خبریالان وژل شوي دي.
د دغه مرکز د څېړنو له مخې، سږکال اسراییل شاوخوا ۸۶ خبریالان او د رسنیو کارمندان وژلي، چې تېر ۲۰۲۴ کال دغه شمېر ۸۵ تنه وو.
دوی ویلي، چې په سوډان کې د رسنیو ۹ غړي وژل شوي چې په دغه هېواد کې د کورنۍ جګړې له کبله دغه شمېر ۱۵ ته رسېږي.
په خبرپاڼه کې راغلي، چې په دې جګړه کې خبریالان تښتول شوي، جنسي تېری پرې شوی او د چټک ملاتړ ځواکونو له خوا تېښتې ته اړ شوي دي.
د روسیې پوځ په اوکراین کې ۴ خبریالان وژلي، چې په ۲۰۲۴ کال یو خبریال وژل شوی و.
یادې کمېټې ویلي، چې په مکسیکو کې د خبریالانو وژنې د تېر کال په پرتله پنځه ځله زیاتې شوي او په فلیپين کې تېر کال د خبریالانو وژنې صفر؛ خو سږ کال درېیو ته رسېدلي.
د خوندیتوب کمېټې له نړۍوالې ټولنې غوښتي، چې اسراییل باید د خپلو کړنو له امله حساب ورکونې ته مجبور کړي.
