د افغانستان لپاره د ملګرو ملتونو د بشري حقونو ځانګړي راپور ورکوونکي رېچارډ بېنټ د مادرید په درېیمه غونډه کې د افغان مېرمنو د وضعیت په اړه ویلي، چې د ښځو په وړاندې د طالبانو کړنې «د بشریت پر ضد جرمونه» دي او د طالبانو ادارې لپاره دې د «جنسیتي اپارتاید» اصطلاح وکارول شي.
بېنټ له طالبانو سره د اړیکو عادي کولو په اړه خبرداری ورکړی او وايي، چې د طالبانو د ادارې لپاره دې د «جنسیتي اپارتاید» اصطلاح وکارول شي.
نوموړي د یادې غونډې پرمهال ویلي، چې په افغانستان کې بشري حقونه په ډیر خراب وضعیت کې شتون لري.
بېنټ ټینګار وکړ، چې طالبانو د ښځو د خوندیتوب ټول قانوني او قضايي جوړښتونه له منځه وړي دياو ښځې په دغه ډول شرایطو کې سختې اغېزمنې شوې دي.
نوموړي پر هېوادونو غږ کړی، چې د طالبانو سره دې هر ډول تعامل د بشري حقونو او په ځانګړي توګه د ښځو حقونو ته په درناوي سره مشروط کړي.
بېنټ زیاته کړې:«د افغانستان موخه له لاسه نه ده وتلي او نه يي هم موږ باید له پامه و غورځوو. دا زموږ لپاره یوه ازموینه ده. طالبان باید مسول وګڼل شي او له دوی سره د اړیکو عادي کول له اخلاقي او ستراتیژیک پلوه غلط دي.»
ریچارډ بېنټ ټینګار وکړ، چې له طالبانو سره د اړیکو لپاره باید ځانکړي شرایط وټاکل شي او د دې شرایطو له پوره کولو پرته باید له دوی «طالبانو» سره هېڅ اړیکه ونه نیول شي.
