د پخواني جمهوري نظام د دفاع سرپرست وزیر شاه محمود میاخېل پر افغانستان د بشري مرستو درولو کمپاین ته په غبرګون کې ویلي، چې دا کمپاین د انساني، اخلاقي، افغاني او ټولو ارزښتونو خلاف عمل دی.
د پخواني جمهوري نظامي دغه چارواکي ویلي، چې ځینو کسانو د طالبانو لاس ته د بشري مرستو لوېدو په پلمه افغانستان ته د مرستو درولو کمپاین پیل کړی دی.
نوموړي ویلي، چې د ډیری افغانانو ژوند پر بشري مرستو تکیه دی او عام ولس باید د طالبانو یا نړیوالو د ناسمو پالیسیو قرباني نه شي.
شاه محمود میاخېل زیاته کړې، چې له بشري مرستو څخه د طالبانو د استفادي مخنیوي لپاره دې د مرستو درولو کمپاین پرځای داسې لارې چارې ولټول شي، چې بشري مرستې حقدارو کسانو ته ورسیږي.
میاخېل ویلي:« د ولس په ضد د مرستو بندیدل ظلم دی. په هېڅ صورت کې باید په ولس باندې مرستې ونه درول شي. په ولس مرستې درول د انساني، اخلاقي، افغاني او ټولو ارزښتونو خلاف عمل دی.»
شاه محمود میاخېل په مشخص ډول د کوم چا د نوم یادونه نه ده کړې، خو وايي، افغانستان ته د مرستو درولو په کمپاین کې داسې کسان لاس لري، چې افغانستان کې هېڅ خواخوږي او خپلوان نه لري.
نوموړي په ټینګار سره ویلي، چې افغانان باید د هېڅ ډول سیاسي او خود غرضه کمپاینونو قرباني نه شي او د هرې مبارزې موخه باید د افغانستان د ولس سوکالي او ارامي وي.
دا په داسې حال کې ده، چې د افغانستان په اړه د ملګرو ملتونو د امنیت شورا په غونډه کې هم د طالبانو له خوا د بشري مرستو پر استفاده نیوکې شوې وي.
