شاه محمود میاخېل: پر افغانستان د بشري مرستو د درولو کمپاین په اړمنو خلکو ظلم دی

د طالبانو د اسخباراتو ریاست مرستیال تاجمیر جواد چې نن شنبه، د لیندۍ ۲۲مه یې د یوې مدرسې په فراغت غونډه کې وینا کوله وویل، چې د دوی ډله په دې باور لري چې د دیني علومو په ودې او پرمختګ سره اسلامي سپېڅلې عقیده تضمین کېږي او د عصري علومو په وده او پرمختګ سره هېواد د سوکالۍ او پرمختګ څخه برخمن کېږي.

هغه په خپلو څرګندونو کې وویل، چې مونږ سیمه‌ییز امنیت او ثبات ته د شریعت د لارښوونو او د خپل هېواد د مصالحو په رڼا کې ژمن یو.

تاجمیر جواد وايي:«موږ جګړه نه‌غواړو، خو که جګړه پر مونږ وتپل شي، نو د خپل اسلامي شرعي نظام او اسلامي خاورې د دفاع په لاره کې به داسې وړتیاوې ښکاره کړو، چې ټولې اوسني محاسبې به ناسمې وښيي او جنګ‌ غوښتونکي به د خپل ژوند تر ټولو سخته پښېماني تجربه کړي.»

دا سرګندونې په داسې مهال کېږي، چې په دې وروستیو کې د طالبانو د چارواکو ترمنځ د خپلې واکمنۍ او د امیر د اطاعت په اړه بحثتونه زیات شوي دي.

د طالبانو د سرحدي پولیسو عمومي قوماندان حزب الله افغان ویلي، چې په اسلامي نظام کې اطاعت یوازې اداري اصول نه بلکې شرعي حکم دی.

نوموړي ویلي، چې «اطاعت هغه وخت برکت راوړي چې له اخلاص، تقوا او پاک نیت سره مل وي.»

د طالبانو د سرحدي پولیسو قوماندان زیاته کړې:«د مجاهدینو صف باید د اعتماد او باور پر بنسټ جوړ وي، نه د بدګماني، نه سیالي او نه هم شخصي تمایلات.»

دغه طالب چارواکي ویلي، که یو صف کې اعتماد له منځه لاړ شي هغه صف ماتي خوري.

نوموړي دا څرګندونې پر داسې مهال کړې، چې د طالبانو د کورنیو چارو وزیر سراج الدین حقاني تېره ورځ د خوست په یوه جومات کې د وینا پرمهال د وېرې او ډار پر واکمنۍ نیوکه وکړه او ویې ویل:«هغه حکومتونه چې ولس وېروې، هغه حکومت نه دی.»

حقاني له خلکو سره د طالبانو چلند ته په اشاره ویلي:«مونږ یو ځل امپراتورانو لخوا محکم شوي یوو، خو اوس موږ پخپل منځ کې دومره تحمول او برداشت نه لرو او ددې په ځای چې مونږ یې محکوم کړو، باید دا پټې له منځه یوسو او داسې تعامل ورسره وکړو چې بدبینۍ له منځه لاړې شي.»

د حقاني دغه څرګندونو ته د طالبانو د لوړو زده کړو وزیر هم غبرګون ښودلی او وايي، چې په اسلامي نظام کې یوازې یو امیر شتون لري او له هغه باید اطاعت وشي.

د طالبانو د کورنیو چارو وزارت د شنبې په ورځ، د لېندۍ ۲۲مه د یوې خبرپاڼې په خپرولو سره ویلي، چې د تېر یوه کال په لړ کې په غزني ولایت کې نیول شوي زرګونه نشه يي توکي یې نن وسوځول.

د خبرپاڼې د معلوماتو له مخې، په یادو سوځول شویو نشه يي توکو کې ۴۶۴ کیلوګرامه چرس، ۳۶۵ کیلوګرامه تریاک، ۷۷۴۳ کیلوګرامه ایف، ۳۵۰ کیلوګرامه هیروین، ۱۵ کیلوګرامه شیشه، ۳۵۰۰ دانې نشه يي ګولۍ او نور نشه يي توکې شامل وو.

طالبانو د یادو نشه يي توکو د قاچاق او کاروبار په تور د نیول شویو کسانو په اړه څه نه دې ویلي.

سره له دې چې طالبانو په عام ډول د نشه يي توکو پر کر او قاچاق بندیز لګولی، خو لا هم د هېواد په ځینو ولایتونو کې د تریاکو کرل او کاروبار دوام لري.

د برېښنا شرکت د یوې خبرپاڼې په خپرولو سره ویلي، چې د کابل په سروبي ولسوالۍ کې د ۲۲،۷۵ مېګاواټه لمریزې برېښنا تولید پروژې چارې ۹۹ سلنه بشپړې شوي دي.

طالبانو یاده پروژه د لمریزې برېښنا د تولید تر ټوله ستره پروژه بللې ده او وايي، چې د برېښنا کمښت لویه تشه به ډکه کړي.

د برېښنا شرکت د خبرپاڼې له مخې، د یادې پروژې په بشپړېدو سره به د برېښنا په عمومي شبکې کې په کلنې ډول ۴۲۵۷۵ مېګاواټه برېښنا پېرودونکو ته ووېشل شي.

طالبانو ویلي، چې د کابل په سروبي کې د لمریزې برېښنا له تولید څخه به په صنعتي، سوداګریزو او هستوګنیزو برخو کې ګټه واخیستل شي.

د یادې پروژې چارې د ۲۰۲۴ کال په لومړیو کې پیل شوې وي او په نږدې وخت کې به ګټې اخیستنې ته وسپارل شي.

طالبانو تردې وړاندې هم د هېواد په ځینو نورو ولایتونو کې د برېښنا د تولید د پروژو د چارو د پیل خبر ورکړی و، خو لا هم د کابل په ګډون په ګڼو ولایتونو کې د برېښنا د کمښت له امله خلک له ستونزو سره مخ دي.

د کابل دارالامان د سیمې اوسېدونکو نن شنبه، د لیندۍ ۲۱ مه وویل ، چې د چهارشنبې په ورځ د لیندۍ ۱۹مه د سیمې اوسیدونکو د عدلیې وزارت ته نږدې په یوه هدیره کې د یو ځايي اوسېدونکي جسد ښخ کړ.

له دې پېښې وروسته وسله والو طالبانو او د عدلیې وزارت استازو له ځایي خلکو وغوښتل چې جسد راوباسي او بل ځای ته یې انتقال کړي.

د طالبانو عدلیې وزارت مخکې ځايي اوسیدونکو ته خبرداری ورکړی و چې خپل مړي به په دې هدیره کې نه ښخوي او دوی ادعا کوي چې هدیره په شنه زون کې شامله ده.

خو ځايي اوسیدونکي وايي چې دوی له څو لسیزو راهیسې په دې هدیره کې خپل مړي ښخوي خو طالبانو له دوی څخه غوښتي چې شته جسدونه راوباسي او بل ځای ته یې انتقال کړي.

د سرچینو په وینا ځايي اوسیدونکو د چهارشنبې په ورځ وروسته له هغه لاریون وکړ چې طالبانو دوی د دې کار څخه منع کړل.

د دوی په وینا، د طالبانو د عدلیې وزارت چارواکو ۳۸ لاریون کوونکي ونیول، چې پکې د جومات ملا امام او د سیمې وکیل هم شامل وو.

افغانستان انټرنشنل - پښتو په ترلاسه کړو ویډیوګانو کې ښګاري چې د سیمې لسګونه اوسیدونکي د دارالامان سړک په لور روان لیدل کېږي.

یو ځايي اوسیدونکي وویل چې د نیول کیدو څخه درې ورځې وروسته، لاهم د دوی د ځای یا وضعیت په اړه هیڅ معلومات نشته.

د هغه په ​​وینا، ځايي اوسیدونکو د شپږمې حوزې او نورو طالبانو چارواکو سره اړیکه ونیوله، مګر دوی مثبت ځواب ترلاسه نه کړ.

دوی وايي چې د طالبانو د عدلیې وزارت په دې سیمه کې د جومات ځمکه «د امارت ځمکه» بللې ده.

ځايي اوسېدونکي ادعا کوي چې د جومات ځمکه د یوه ځايي اوسېدونکي لخوا ورکړل شوې او شرعي سند لري.

سرچینې وايي چې دا اقدامات د طالبانو د عدلیې وزیر په امر ترسره کېږي. د دوی په وینا، د طالبانو د عدلیې وزیر هڅه کوي چې دا محدودیتونه ولګوي او ځايي اوسیدونکي جبري کډوالۍ اړ کړي.

د طالبانو په منځ کې سرچینې وايي، چې د طالبانو د عدلیې وزیر عبدالحکیم شرعي د طالبانو په منځ کې په خپلسرو کړنو تورن دی او دی ځواب ویونکی نه دی.

تر دې مخکې د کابل په دارالامان کې د سناتوریم سیمې اوسیدونکو هم د لړم په میاشت کې ویلي وو چې د طالبانو د عدلیې وزیر عبدالحکیم شریعي د دې سیمې اوسیدونکي په زوره له خپلو کورونو څخه اېستلي او کورونه یې خپلو خپلوانو ته ورکړي دي.

د طالبانو د عدلیې وزیر د دارالامان د سناتوریم په سیمه کې ژوند کوي.

د سرچینو په وینا، د طالبانو د وزیر اړوند کسانو له ځینو کورونو ښځې او ماشومان له خپلو کورونو څخه اېستلي او کډوالۍ ته یې اړ کړي دي.