طالبان: غزني کې مو نږدې ۹ زره کیلوګرامه نشه‌يي توکي سوځولي دي

د برېښنا شرکت د یوې خبرپاڼې په خپرولو سره ویلي، چې د کابل په سروبي ولسوالۍ کې د ۲۲،۷۵ مېګاواټه لمریزې برېښنا تولید پروژې چارې ۹۹ سلنه بشپړې شوي دي.

طالبانو یاده پروژه د لمریزې برېښنا د تولید تر ټوله ستره پروژه بللې ده او وايي، چې د برېښنا کمښت لویه تشه به ډکه کړي.

د برېښنا شرکت د خبرپاڼې له مخې، د یادې پروژې په بشپړېدو سره به د برېښنا په عمومي شبکې کې په کلنې ډول ۴۲۵۷۵ مېګاواټه برېښنا پېرودونکو ته ووېشل شي.

طالبانو ویلي، چې د کابل په سروبي کې د لمریزې برېښنا له تولید څخه به په صنعتي، سوداګریزو او هستوګنیزو برخو کې ګټه واخیستل شي.

د یادې پروژې چارې د ۲۰۲۴ کال په لومړیو کې پیل شوې وي او په نږدې وخت کې به ګټې اخیستنې ته وسپارل شي.

طالبانو تردې وړاندې هم د هېواد په ځینو نورو ولایتونو کې د برېښنا د تولید د پروژو د چارو د پیل خبر ورکړی و، خو لا هم د کابل په ګډون په ګڼو ولایتونو کې د برېښنا د کمښت له امله خلک له ستونزو سره مخ دي.

د کابل دارالامان د سیمې اوسېدونکو نن شنبه، د لیندۍ ۲۱ مه وویل ، چې د چهارشنبې په ورځ د لیندۍ ۱۹مه د سیمې اوسیدونکو د عدلیې وزارت ته نږدې په یوه هدیره کې د یو ځايي اوسېدونکي جسد ښخ کړ.

له دې پېښې وروسته وسله والو طالبانو او د عدلیې وزارت استازو له ځایي خلکو وغوښتل چې جسد راوباسي او بل ځای ته یې انتقال کړي.

د طالبانو عدلیې وزارت مخکې ځايي اوسیدونکو ته خبرداری ورکړی و چې خپل مړي به په دې هدیره کې نه ښخوي او دوی ادعا کوي چې هدیره په شنه زون کې شامله ده.

خو ځايي اوسیدونکي وايي چې دوی له څو لسیزو راهیسې په دې هدیره کې خپل مړي ښخوي خو طالبانو له دوی څخه غوښتي چې شته جسدونه راوباسي او بل ځای ته یې انتقال کړي.

د سرچینو په وینا ځايي اوسیدونکو د چهارشنبې په ورځ وروسته له هغه لاریون وکړ چې طالبانو دوی د دې کار څخه منع کړل.

د دوی په وینا، د طالبانو د عدلیې وزارت چارواکو ۳۸ لاریون کوونکي ونیول، چې پکې د جومات ملا امام او د سیمې وکیل هم شامل وو.

افغانستان انټرنشنل - پښتو په ترلاسه کړو ویډیوګانو کې ښګاري چې د سیمې لسګونه اوسیدونکي د دارالامان سړک په لور روان لیدل کېږي.

یو ځايي اوسیدونکي وویل چې د نیول کیدو څخه درې ورځې وروسته، لاهم د دوی د ځای یا وضعیت په اړه هیڅ معلومات نشته.

د هغه په ​​وینا، ځايي اوسیدونکو د شپږمې حوزې او نورو طالبانو چارواکو سره اړیکه ونیوله، مګر دوی مثبت ځواب ترلاسه نه کړ.

دوی وايي چې د طالبانو د عدلیې وزارت په دې سیمه کې د جومات ځمکه «د امارت ځمکه» بللې ده.

ځايي اوسېدونکي ادعا کوي چې د جومات ځمکه د یوه ځايي اوسېدونکي لخوا ورکړل شوې او شرعي سند لري.

سرچینې وايي چې دا اقدامات د طالبانو د عدلیې وزیر په امر ترسره کېږي. د دوی په وینا، د طالبانو د عدلیې وزیر هڅه کوي چې دا محدودیتونه ولګوي او ځايي اوسیدونکي جبري کډوالۍ اړ کړي.

د طالبانو په منځ کې سرچینې وايي، چې د طالبانو د عدلیې وزیر عبدالحکیم شرعي د طالبانو په منځ کې په خپلسرو کړنو تورن دی او دی ځواب ویونکی نه دی.

تر دې مخکې د کابل په دارالامان کې د سناتوریم سیمې اوسیدونکو هم د لړم په میاشت کې ویلي وو چې د طالبانو د عدلیې وزیر عبدالحکیم شریعي د دې سیمې اوسیدونکي په زوره له خپلو کورونو څخه اېستلي او کورونه یې خپلو خپلوانو ته ورکړي دي.

د طالبانو د عدلیې وزیر د دارالامان د سناتوریم په سیمه کې ژوند کوي.

د سرچینو په وینا، د طالبانو د وزیر اړوند کسانو له ځینو کورونو ښځې او ماشومان له خپلو کورونو څخه اېستلي او کډوالۍ ته یې اړ کړي دي.

په خوست کې د طالبانو د والي ویاند مستغفر ګربز د یوې خبرپاڼې په خپرولو سره ویلي، چې د یادې ډلې د کورنیو چارو وزیر سراج الدین حقاني په خوست د یاد ولایت د والي، امنیه قوماندان، د استخباراتو رییس، د ادارو رییسانو او ولسوالانو سره ناسته کړې ده.

سراج الدین حقاني په یاده ناسته کې له خلکو سره په ښه چلند کولو ټینګار کړی.

په خبرپاڼه کې د حقاني له قوله لیکل شوي:«زموږ ولس سختې ورځې تېرې کړي، په انقلابونو کې یې له حکومتونو د خېر پر ځای شر لیدلی دی. دا نظام د ولس په قربانیانو راغلی او باید د دوی خدمتګذار وي، د حل مرجع وي، عادل وي او خدمات وړاندې کړي.»

سراج الدین حقاني تېره ورځ هم په خوست کې په یوه وینا کې ویلي و، چې طالبان باید د وېرې له لارې پر خلکو حکومت ونه کړي.

نوموړي زیاته کړې وه، هغه حکومت چې د «وېرې او زور» له لارې خلک اداره کوي رښتینی حکومت نه دی.

په ارزګان کې ځايي سرچینو نن شنبه، د لیندۍ ۲۲مه وویل، چې د طالبانو د ارزګان ولایت امنیه قومندانۍ امنیت امیر او ددې ډلې د ارزګان د لومړی حوزې امیر احمد ارشاد او معاون مدد هغه مسوولین دی، چې د پخوانیو نظامیانو او چارواکو خپلوانو ځورولو ته کار ویلی دی.

سرچینو وویل:« دا درې طالب چارواکي په ارزګان کې د پخوانیو نظامیانو د پیسو او د وسلو اخیستلو لپاره زنداني کوی حته دوی د پخواني قومندان درې زامن په غیرقانوني ډل لس ورځې په حوزه کې زنداني کړي وو.»

د رارسېدلو معلوماتو له مخې د طالبانو ځايي مسولینو د تېر حکومت نظامیان او خپلوان په خپل سري ډول نیسي او پرته د محکمې له پرېکړې یې په زندان کې ساتې ترڅو پر زوره وسلې پرې خریداري کړي.

د ارزګان یوځايي اوسېدوونکي افغانستان انټرنشنل - پښتو ته وویل:« د تېر جمهوري نظام پرمهال د ارزګان د پخواني امنیه قوماندان جنرال مطیع الله کورنۍ غړي یې څو ځله ونیول او بیا یې وسلې پر واخیستې او خوشې یې کړل.»

د نړیوالو بشري بنسټونو راپورونو په مسلسل ډول ښودلې، چې څلورو کالو په تېریدو سره طالبانو په بېلابیلو ولایتونو کې د مخکني حکومت کارمندان په ځانګړي توګه پخواني نظامیان ځوروي او زندانونو ته یې اچوي.

جنرال مطیع الله د تېر جمهوري نظام پرمهال د ارزګان امنیه قوماندان و او د ۲۰۱۵ کال په مارچ میاشت کې په کابل کې په یوځانمرګي برید کې ووژل شو.

د طالبانو د اطلاتو او کلتور وزارت د یوې خبرپاڼې په خپرولو سره ویلي، چې په کابل د اذربایجان سفیر الهام محمدوف د یادې ډلې د اطلاعاتو او کلتور وزارت د ګرځندوی، مالي او اداري چارو معین قدرت الله جمال سره کتلي دي.

په خبرپاڼه کې د اذربایجان د سفیر له قوله لیکل شوي، چې یاد هېواد له طالبانو سره د سیاسي، سوداګریزو، اقتصادي او فرهنګي اړیکو پیاوړتیا او پراختیا باندې ټینګار کړی.

طالبانو ویلي، چې د اذربایجان سفیر د انلاین کورسونو له لارې د افغان ځوانانو روزلو لپاره چمتوالی ښودلی.