د طالبانو د کډوالو او راستنېدونکو چارو وزارت اعلان کړی چې په کابل کې یې د ملګرو ملتونو له استازو سره تخنیکي ناسته کړې ده. د کډوالو عالي کمېشنرۍ ویلي چې په ۲۰۲۶کال کې به د راستنېدونکو ملاتړ، نغدي مرستې، حقوقي ملاتړ، سرپناه او د معیشت برابرول د دوی د تمرکز اصلي برخې وي.
په دې ناسته کې، چې دوهمه تخنیکي غونډه بلل شوې، د طالبانو د کډوالو او راستنېدونکو چارو وزارت د وزیر د دفتر مشر سعید احمد بنوري او د ملګرو ملتونو د کډوالو عالي کمېشنرۍ د بېلابېلو څانګو مسوولینو ګډون کړی و.
له یاد وزارت څخه په خپره شوې خبرپاڼه کې راغلي چې سعید احمد بنوري ملګرو ملتونو ته د همکارۍ ډاډ ورکړ او د راستنېدونکو د وضعیت، له پاکستان څخه تر راستنېدو وروسته د هغوی د ستونزو، د ژمي له رارسېدو سره د سرپناه کمښت او نورو بېړنیو اړتیاوو په اړه یې خبرې وکړې.
د طالبانو د کډوالو وزارت په خبرپاڼه کې د ملګرو ملتونو د کډوالو عالي کمېشنرۍ د مشر له قوله ویل شوي چې د دوی لومړیتوب به ۱۱ولایتونه وي، چې کابل، هرات، کندهار او ننګرهار هم پکې شامل دي.
دا په داسې حال کې ده چې ملګرو ملتونو د روان کال د سنبلې په میاشت کې اعلان کړی و چې د طالبانو لهخوا د دغه سازمان په دفترونو کې د ښځو پر کار له بندیز وروسته، د افغانستان لپاره یې د حیاتي مرستو یوه برخه ځنډولې ده.
د کډوالو عالي کمېشنرۍ هغه مهال ویلي و چې په سرحدونو او ښارونو کې د نغدي مرستو او ملاتړ مرکزونه عملاً تړل شوي، ځکه د ښځینه کارکوونکو له حضور پرته د ثبت او مرستو وېش شونی نه دی.
دې ادارې ټینګار کړی و چې له نیمایي ډېر افغان راستنېدونکي ښځې دي او د ښځینه کارکوونکو نشتوالي د دغو مرکزونو فعالیت له جدي ستونزو سره مخ کړی دی.
