د طالبانو د چارو ادارې رییس نور الحق انور د تېر جمهوري نظام پوهنې وزارت ته په اشارې ویلي، چې « د خیالي استادانو او مکتبونو وخت تېر شوی» او د دوی حکومت دې موضوع ته جدي پاملرنه کوي. نوموړي د درملو له قاچاق وړونکو سره د سخت چلند یادونه کړې.
د طالبانود چارو ادارې رییس نورالحق انور «په افغانستان کې د درملو منطقي کارونه او راتلونکی لیدلوری» تر سرلیک لاندې کنفرانس ته د وینا پر مهال وویل، چې د طالبانو له بیا واکمنېدو وروسته په بېلابېلو سکتورونو کې د پام وړ پرمختګونه شوي او دده په وینا، نړیوال هم دغه پرمختګونه مني.
نوموړي ټینګار وکړ، چې د روغتیا په برخه کې د معیاري درملو د کارونې، له بېکیفیته او قاچاقي درملو سره جدي مبارزې او د قانون حاکمیت ته ځانګړې پاملرنه شوې ده.
د هغه په وینا، د طالبانو اداره د ولس د روغتیا خوندیتوب خپل لومړیتوب ګڼي او اجازه به ورنه کړي چې د خلکو ژوند د غیرمعیاري درملو له امله له ګواښ سره مخ شي.
نوموړي ویلي، چې د بېکیفیته درملو د قاچاق کوونکو او قانون ماتوونکو پر ضد به تر ټولو سخت قانوني چلند وشي.
طالبانو په دې وروستیو کې له پاکستان سره د لارو له تړلو او د هند او ایران له درمل واردوونکو کمپنیو سره له هوکړو وروسته د درملو د قاچاق پر وړاندې خپلې هڅې چټکې کړې دي.
انور همدارنګه په تېرو څلورو کلونو کې د نوي نصاب او «د سلګونو تعلیمي مرکزونو» جوړېدل خورا ارزښتناک وبلل او ویې ویل، چې د تعلیمي بنسټونو پراختیا د هېواد د پرمختګ، ځانبسیاینې او د راتلونکي نسل د روزنې لپاره بنسټیز اهمیت لري.
نوموړي د معارف او لوړو زدهکړو په برخه کې د استادانو په اړه وویل چې د خیالي استادانو او خیالي مکتبونو وخت تېر شوی او د دوی حکومت دې موضوع ته جدي پاملرنه لري.
