په تهران کې د یوه افغان په ګډون دوه کارګر له ژورې څاه ژغورل شوي
د تهران ښار د اور وژنې اداره وایي چې ددغه ښار د رحیمي واټ په سیمه کې د یوه افغان په ګډون دوه کارګر چې په یوه ژوره څاه کې بند پاتې وو، رااېستل شوي او روغتون ته یې لېږدولي دي.
د تهران ښار د اور وژنې اداره وایي چې ددغه ښار د رحیمي واټ په سیمه کې د یوه افغان په ګډون دوه کارګر چې په یوه ژوره څاه کې بند پاتې وو، رااېستل شوي او روغتون ته یې لېږدولي دي.
د دغې ادارې ویاند سید جلال ملکي ایرنا خبري اژانس ته ویلي، «یو افغان چې عمر یې ۳۲ کاله دی، له خپل بل ملګري کارګر سره په یوه درې پوړیز زاړه کور کې په زیرزمیني څاه کې بند پاتې شوی و، موږ ته غرمې مهال د پېښې خبر راکړل شو او دوه ټیمونه مو د پېښې ځای ته واستول.»
ملکي زیاته کړې، چې د لومړنیو معلوماتو له مخې، یاده څاه شاوخوا ۲۵متره ژوره وه، یو کارګر په کار کولو کې کمزوری او بې سده شوی و،او دویم کس د مرستې لپاره څاه ته ورکښېوت، خو هغه هم بند پاتې شوی و.
سید جلال ملکي وایي چې د اور وژنې مامورینو د اړینو اقداماتو او د هوا د مناسب حالت ډاډ ترلاسه کولو وروسته یو عملیاتي کارګر څاه ته کوز کړ او دواړه کارګران یې راوباسل.
ویل کېږي چې بېړني روغتیایي کارکوونکو کارګران روغتون ته لېږدولي خو د دواړو کارګرو روغتیایي وضعیت خورا نازک ښودل شوی.
