د افغانستان لپاره د پاکستان پخوانی ځانګړی استازی اصف درانی وايي، چې د طالبانو مشر هبت الله اخوندزاده باید ځان خبر کړي چې هېوادوال یې له سختې لوږې سره مخ دي. نوموړي ویلي، چې د افغانستان ۹۷ سلنه وګړي وږي او د ۵۰ سلنه وګړو ژوند پر نړیوالو مرستو تکیه دی.
اصف دراني نن د جمعې په ورځ، د لېندۍ ۲۸مه پر خپله اېکسپاڼه لیکلي، چې د تېرو څلورو لسیزو مرګونو او ویجاړیو مسول د طالبانو مشران دي.
نوموړي د ملګرو ملتونو وروستي راپور ته په غبرګون چې په افغانستان کې د بیکارۍ کچه ۷۵ سلنې ته رسیدلي او له ۹۰ سلنې ډېر وګړي د فقر تر کرښې لاندې ژوند کوي، ویلي چې افغانستان د ترهګرو ډلو په امن ځای بدل شوی او له امله یې ګاونډیان له جدي ګواښ سره مخ دي.
اصف دراني ویلي:«له بده مرغه د طالبانو چارواکي او د هغوی مدافعین یا له حقیقتونو څخه ناخبره دي او یا هم له ترهګرو سره په اړیکه کې دي. نه پوهیږم، چې د طالبانو مشر له ځمکني واقعیتونو څخه ناخبره دی او یا هم څه چې دوام لري د هغه «ملا هبت الله» په ملاتړ ترسره کېږي.»
دا په داسې حال کې ده، چې د ملګرو ملتونو د امنیت شورا په خپل وروستي راپور کې ویلي، چې دمګړی په افغانستان کې د ټي ټي پي، القاعده، د ترکستان اسلامي حرکت او د ازبکستان اسلامي غورځنګ په ګډون شل ترهګري ډلي فعاله دي.
