ټرمپ: د ونزوېلا د تیل وړونکو بېړیو درول کېدای شي جګړه راولاړه کړي
د امریکا ولسمشر ډونالد ټرمپ له یوې رسنۍ سره په مرکه کې د ونزوېلا سره د احتمالي جګړې امکان رد نه کړ او ویې ویل چې د ونزوېلا د تیلو وړونکو بېړیو ودرول کېدای شي د جګړې سبب شي.
د امریکا ولسمشر ډونالد ټرمپ له یوې رسنۍ سره په مرکه کې د ونزوېلا سره د احتمالي جګړې امکان رد نه کړ او ویې ویل چې د ونزوېلا د تیلو وړونکو بېړیو ودرول کېدای شي د جګړې سبب شي.
هغه د این بي سي نیوز شبکې سره په خبرو کې په دې اړه ډیر جزییات ورنکړل، خو بیا یې په څرګنده ټینګار وکړ چې داسې امکان شته.
ټرمپ د سه شنبې په ورځ د هغو تحریم شویو تیل وړونکو بیړیو د «محاصرې» حکم ورکړ چې د ونزوېلا څخه تګ راتګ کوي. د امریکا چارواکو په خبره دا اقدام د ونزوېلا پر ولسمشر نیکولاس مادورو د فشار زیاتولو لپاره شوی دی. همداراز امریکا په دې وروستیو کې یوه تیل وړونکې بېړۍ چې د ونزوېلا په نږدې سیمو کې توقیف شوې وه، ضبط کړېده.
ولسمشر ټرمپ وویل چې د تیل وړونکو بېړیو توقیف به روان وي او نورې بېړۍ به هم ضبط شي. په ورته وخت کې هغه د دې پوښتنې په اړه چې ایا د واک څخه د نیکولاس مادورو لرې کول د واشنګټن وروستۍ موخه ده که نه، ډاډمن ځواب ورنه کړ.
