د افغانستان د وزلوبې غوره لیګ اووم پړاو سیالۍ د سرپل لوبډلې په اتلولي پای ته ورسېدې. په پایلوبه کې د سرپل لوبډلې د بدخشان ټیم ته د صفر پر وړاندې په ۷ امتیازونو ماته ورکړه او د اتلولۍ جام یې خپل کړ.
د ډلبندۍ په لوبه کې بیا د بغلان ټیم د کندز پر وړاندې په ۶-۴ بریالی شو او درېیم ځای یې وموند.
د پایلوبې ستوری عمر بیک و، چې په دې لوبه کې یې پنځه وزې ترلاسه کړې او د خپل ټیم په بري کې یې ټاکونکی رول ولوباوه.
نوموړی په نیمه پایلوبه کې هم وځلېد و او پنځه امتیازونه یې ترلاسه کړي وو.
دغه سیالۍ د لیندي پر ۲۱مه د ۱۱ ټیمونو په ګډون پیل شوې وې او له لسو ورځو پرلهپسې سیالیو وروسته د دوشنبې په ورځ پای ته ورسېدې.
د افغانستان د فوټسال ملي لوبډله به نن (د مرغومي لومړۍ نېټه) د ۲۰۲۶کال اسیا جام سیالیو لپاره د چمتووالي پروګرامونو د یوې برخې په توګه د کوېټ پر وړاندې خپله دویمه لوبه وکړي. دغه لوبه د کابل په وخت د شپې په ۸:۳۰ بجو پیلېږي.
د افغانستان د فوټسال ملي لوبډله په خپلې لومړۍ دوستانه لوبه کې د شنبې په ورځ (د لېندۍ په ۲۹مه) د کوېټ لوبډلې پر وړاندې د ۴-۴ امتیازونو سره لوبه مساوي کړه. د افغانستان د فوټبال فدراسیون اعلان کړی، چې د فوټسال ملي لوبډله به د ۲۰۲۶کال اسیا جام سیالیو لپاره د چمتووالي پروګرامونو د یوې برخې په توګه د ویتنام ملي لوبډلې سره هم مخ شي.
د افغانستان د فوټسال ملي لوبډله به په ویتنام کې یو روزنیز کمپ کې برخه واخلي؛ ترڅو د ۲۰۲۶کال په اسیا جام کې پیاوړی حضور ولري. د یاد پروګرام د مهالوېش له مخې؛ د افغانستان د فوټسال ملي لوبډله به د روانې مرغومي میاشتې په ۲۹مه او د ۱۴۰۴کال د سلواغې په لومړۍ نېټه د ویتنام د فوټسال ملي لوبډلې پر وړاندې دوه تمریناتي لوبې ترسره کړي.
دارنګه د فوټبال فدراسیون په وینا؛ ملي لوبډله به د ۱۴۰۴کال د مرغومې له ۶مې تر ۲۶مې پورې د ایران په مشهد ښار کې تمرینات وکړي.
د افغانستان د فوټسال ملي لوبډلې تخنیکي کارکوونکو ۱۷ لوبغاړي دغه روزنیز کمپ ته بللي دي، چې پهکې مهران غلامي، علي رضا جعفري، فرزاد محمودي او محمد رضا کریمي شامل دي.
بلل شوي لوبغاړي:
ګول ساتونکي:
محمدجواد صفري، عليرضا جعفري، علياحمد محسني.
د میدان لوبغاړي:
مهدي نوروزي (لوبډلمشر)، حمیدرضا حسیني، خداداد ابراهیمي، رضا حسین پور، مهران غلامي، امید قنبري، اکبر کاظمي، محمد مرادي، فرزاد محمودي، سید مرتضی حسیني، سید مجتبی حسیني، سید مرتضی حسیني، سید حسین موسوي، محمدرضا کریمي او عباس حیدري.
ورته مهال د افغانستان د فوټسال ملي لوبډلې لوبډلمشر مهدي نوروزي د ایران غوره لیګ سیالیو پرمهال ټپي شو. د هغه ټپ جدي دی او ښایي په راتلونکو تمریناتو او سیالیو کې ګډون ونه کړي.
د افغانستان فوټبال فدراسیون هم اعلان کړی، چې د فوټسال ملي لوبډله به د ۱۴۰۴کال د سلواغې ۵مه د ۲۰۲۶کال اسیا جام کې د ګډون لپاره اندونیزیا ته ولاړه شي.
د دغه سیالیو وروستی پړاو به د ۱۴۰۴کال د سلواغې له ۷مې تر ۱۸مې نېټې پورې (د ۲۰۲۶ کال د جنورۍ له ۲۷مې څخه د فبرورۍ تر ۷مې نېټې پورې) په اندونیزیا کې ترسره شي، چې ۱۶ لوبډلې به پهکې ګډون وکړي. د افغانستان د فوټسال ملي لوبډله د دغه سیالیو په څلورم ګروپ کې له ایران، سعودي عربستان او مالیزیا سره همډلې ده.
د سیالیو بشپړه ډلبندي:
لومړۍ ډله: اندونیزیا، عراق، قرغزستان، سویلي کوریا.
دویمه ډله: ټایلنډ، ویتنام، کوېټ، لبنان.
درېیمه ډله: جاپان، ازبکستان، تاجکستان، اسټرالیا.
څلورمه ډله: ایران، افغانستان، سعودي عربستان، مالیزیا.
په پاکستان کې د طالبانو سفیر سردار احمد شکیب وايي، د اسلاماباد د ډیپلوماټیک لیګ په نهم پړاو کې د طالبانو سفارت د فوټبال لوبډلې لوبه او پرلهپسې بریاوې د ویاړ وړ دي. په دغه لیک د سفارت لوبډلې څلور سیالۍ سر په سر ګټلي دي.
د طالبانو سفیر سردار احمد شکیب په خپله ایکسپاڼه لیکلي، چې د اسلاماباد د ډیپلوماټیک لیګ (نهم پړاو) په سیالیو کې د سفارت د فوټبال لوبډلې غوره فعالیت د ستاینې وړ دی.
هغه ویلي، چې یادې لوبډلې څلور لوبې ترسره کړې او په ټولو کې بریالۍ شوې ده، چې پکې په وروستۍ لوبه کې د ۱۵–۲ په لوی توپیر بریا هم شامله ده.
سردار احمد شکیب همدارنګه د دې ډیپلوماټیک ورزشي لیګ له تنظیموونکو مننه کړې او ویلي یې دي، چې د دې ډول ورزشي او ډیپلوماټیکو پروګرامونو تنظیم او مدیریت د هېوادونو ترمنځ د اړیکو د پیاوړتیا لامل ګرځي.
د افغانستان د وزلوبې غورهلیګ د اووم پړاو نیمهپای لوبه به نن د یکشنبې په ورځ (د لیندۍ ۳۰مه) د کابل په یکهتوت لوبغالي کې ترسره شي. په لومړۍ لوبه کې به د بدخشان د وزلوبې لوبډله د بغلان له لوبډلې سره مخامخ شي او په دویمه لوبه کې به د کندوز او سرپل لوبډلې سره مخ شي.
دا سیالۍ چې په دې وروستیو ورځو کې د بدخشان لوبډلې لهخوا د لوبغاړو د ګومارنې په وړاندې د کندوز لوبډلې د اعتراض له امله له لانجو او جنجالونو سره مل وې، له نن څخه تر ټولو حساسو پړاوونو ته داخلېږي.
د بدخشان لوبډله چې د سیالیو د دویم پړاو د لومړۍ ډلې په سر کې ده، د بغلان له لوبډلې سره سیالي کوي؛ بغلان لوبډله د دویم ګروپ په دویم ځای کې قرار لري او نیمهپایلوبې ته یې لاره پيدا کړې.
په بله سیالۍ کې د سرپل ټیم چې د دویم پړاو د دویم ګروپ په سر کې دی، د کندوز له لوبډلې سره مخ دی. په دې پړاو کې د کندوز یوازینۍ ماتې هغه سیالي وه، چې د تنظیموونکو د پرېکړې له مخې د لوبې له ترسره کېدو پرته د بدخشان لوبډلې په ګټه اعلان شوې وه.
د افغان کرېکټ د غورهلیګ د دویم پړاو د پیل ځانګړي مراسم په متحدهعربي اماراتو کې ترسره شول. په مراسمو کې د افغانستان کرېکټ بورډ له خپلو ستراتیژیکو پانګهوالو او شریکانو سره یو ځای د لیګ د دویم پړاو د پیل نېټه، کوربه هېواد، د لوبډلو شمېر او د لیګ نوې لوګو په رسمي ډول معرفي کړل.
د افغانستان د کرېکټ بورډ اجراییوي رییس نصیبخان وویل، چې د افغانستان کرېکټ غورهلیګ به په ۲۰۲۶ کال کې په متحدهعربي اماراتو کې ترسره شي.
هغه زیاته کړه: «دا لیګ به پنځه لوبډلې ولري او د افغانستان کرېکټ غورهلیګ لوګو هم نوې شوې ده.»
په همدې غونډه کې د افغانستان د کرېکټ بورډ عمومي رییس میرویس اشرف وویل، چې د افغانستان کرېکټ غورهلیګ یوه ستره او عایداتي پروژه ده.
نوموړي د لیګ د ګټو په اړه وویل: «دا لیګ د نویو ځوانانو لپاره مالي مرسته برابروي، تخنیکي اړخ یې پیاوړی کوي او دا یې تر ټولو مهمې ګټې دي.»
خو د غونډې پرمهال د نوې لوګو په اړه چې پکې د افغانستان د ملي بیرغ درې رنګه نښان نه و، د کرېکټ بورډ مشرانو هېڅ وضاحت ورنهکړ.
د خلکو غبرګونونه او سختې نیوکې
د افغان کرېکټ غورهلیګ د نوې لوګو له اعلان وروسته دغه پرېکړه د افغان کرېکټ مینهوالو له سختو نیوکو سره مخ شوې ده.
د افغانستان کرېکټ بورډ په رسمي ټولنیزو پاڼو سلګونو کسانو تبصرې کړي او د لوګو بدلون یې په کلکو ټکو غندلی دی.
د ټولنیزو رسنیو یوه کاروونکي لیکلي: «تر دې هغه مخکېنۍ لوګو ښه وه. دا باید د وطن د درې رنګه ملي بیرغ له رنګونو جوړه وای؛ خو ډارن خلک یاست.»
بل کس لیکلي: «ډېره چټي او بې معنا لوګو ده.»
د کرېکټ یوه بل مینهوال بیا لیکلي: «د لوګو د جوړولو لپاره باید عامه سیالي ترسره شوې وای، تر څو مینهوالو ګډون پکې کړی وای او په پای کې تر ټولو غوره لوګو ټاکل شوې وای او ګټونکي ته انعام هم ورکړل شوی وای، په دې سره به د مینهوالو حوصله افزایي شوې وای او لیګ به لا په زړه پورې شوی وای»
یو بل کس په غبرګون کې لیکلي: «دغه ټوله غونډه یوازې په یوه لوګو سره پای ته ورسېدله، بیا مو د ملت په سترګو کې خاورې ورواچولې، شرم دې وي.»
بل مینهوال بیا وایي: «دا داسې پیکه او سپېره لوګو ده چې د سړي زړه پرې نه خوږیږي، همداسې به افغان کرېکټ هم بېخونده او بېرنګه کړي.»
د دې نیوکو او غبرګونو پر دوام بیا د کرېکټ یوه بل مینهوال زیاته کړې: «طالبان پریمیر لیګ ورته ووایئ، لا به ښه وي.»
که څه هم د افغانستان کرېکټ بورډ چارواکي ټینګار کوي، چې د افغانستان کرېکټ غورهلیګ به د هېواد د کرېکټ د ودې، د ځوانانو د ملاتړ او مالي پیاوړتیا لامل شي، خو د نوې لوګو پر سر راپورته شوی ولسي غبرګون ښيي، چې د کرېکټ مینهوال د ملي هویت نښانونو ته ځانګړی ارزښت ورکوي.
تر دې مهاله د افغانستان کرېکټ بورډ د خلکو د دغو نیوکو په اړه کوم رسمي غبرګون نهدی ښودلی او لا هم روښانه نه ده، چې ایا د لوګو په اړه به بیاکتنه کېږي او که نه.
د ننګرهار ولایت په جلالاباد ښار او کوټ ولسوالۍ کې د المپیک، بدني روزنې او ورزش ریاست په همغږۍ د رزمي لوبو، پانکریشن، والیبال او کرکټ سیالۍ ترسره شوې. په دې سیالیو کې د ۲۵۰ څخه زیات ورزشکارانو برخه اخیستې وه او ځینې یې د اتلولۍ کپونه او غوره لوبغاړو جایزې وګټلې.
په ننګرهار کې د طالبانو رسنیو دفتر له خوا په خپره شوې خبرپاڼه کې راغلي، په جلالاباد ښار کې د رزمي لوبو (UFC) سیالۍ د ۵۰ ورزشکارانو ترمنځ د درې کټګوریو په اساس ترسره شوې، چې په پایله کې ۲۵ لوبغاړي بریالي وپېژندل شول.
خبرپاڼه کې راغلي، د پانکریشن سیالۍ د ۴۲ ورزشکارانو ترمنځ ترسره شوې او ۲۱ لوبغاړو یې بریاوې ترلاسه کړې. همدارنګه د والیبال فدراسیون له لوري په کوټ ولسوالۍ کې د ۱۲ داخلي لوبډلو ترمنځ د غوره لوبډلې د ټاکلو لپاره سیالۍ پیل شوې، چې لس ورځې به دوام ولري.
په خبرپاڼه کې همدا راز راغلي، د انبارخاني پنځوس بالیز ټیپ بال کرکټ ټورنمنټ د ۲۲ لوبډلو ترمنځ ترسره شو، چې د یوې میاشتې سیالیو وروسته د انبارخاني اخند سټار لوبډلې د چهاردهي اتلانو پر وړاندې په بریا سره د اتلولۍ کپ خپل کړ.
د ننګرهار د المپیک، بدني روزنې او ورزش ریاست د چارواکو په وینا، د یادو سیالیو موخه د ورزشکارانو هڅونه، د ځوانانو ترمنځ همغږي او د ورزش وده ده.