د ۲۰۲۶کال اسیا جام سیالیو لپاره د چمتووالي پروګرامونو د یوې برخې په توګه د کوېټ پر وړاندې د افغانستان د فوټسال ملي لوبډلې دویمه تمریناتي لوبه ۳–۳ مساوي پای ته ورسېده. د لوبې لومړۍ پاڼۍ کې د افغانستان ملي لوبډله له ۲-۱ امتیازونو سره مخکښه وه.
په لومړۍ لوبه کې هم د دواړه لوبډلو ترمنځ لوبه د ۴-۴ امتیازونو سره مساوي پای ته رسېدلې وه.
په بېګانۍ لوبه کې فرزاد محمودي (لوبډلمشر)، امید قنبري او حامد رضا حسیني د افغانستان د فوټسال ملي لوبډلې لپاره ګولونه ووهل. کوېټ لوبډلې په دویمه پاڼۍ کې لوبه بدله کړه او ۳-۲ امتیازونو سره مخکښه شوه؛ خو حمید رضا حسیني د افغان لوبډلې لپاره درېیم ګول وواهه او لوبه یې مساوي کړه.
د اندونیزیا په کوربهتوب په ۲۰۲۶کال اسیا فوټبال جام سیالیو کې دواړه د افغانستان او کوېټ لوبډلې ګډون کوي. د افغانستان د فوټسال ملي لوبډله د فیفا په وروستۍ ډلبندۍ کې پنځه درجې مخکې راغلې او ۲۸م مقام یې ترلاسه کړی؛ پهداسې حال کې چې د کوېټ لوبډله په ۴۰م ځای کې ده.
په اسیایي ډلبندۍ کې هم افغانستان په اووم او کوېټ په نهم ځای کې دی. د افغانستان د فوټبال فدراسیون اعلان کړی، چې د فوټسال ملي لوبډله به د ۲۰۲۶کال اسیا جام سیالیو لپاره د چمتووالي پروګرامونو د یوې برخې په توګه د ویتنام ملي لوبډلې سره هم مخ شي.
د یاد پروګرام د مهالوېش له مخې؛ د افغانستان د فوټسال ملي لوبډله به د روانې مرغومي میاشتې په ۲۹مه او د ۱۴۰۴کال د سلواغې په لومړۍ نېټه د ویتنام د فوټسال ملي لوبډلې پر وړاندې دوه تمریناتي لوبې ترسره کړي.
دارنګه د فوټبال فدراسیون په وینا؛ ملي لوبډله به د ۱۴۰۴کال د مرغومې له ۶مې تر ۲۶مې پورې د ایران په مشهد ښار کې تمرینات وکړي. یاد فدراسیون دارنګه اعلان کړی، چې د هېواد د فوټسال ملي لوبډله به د ۱۴۰۴کال د سلواغې ۵مه اندونیزیا ته د ۲۰۲۶کال اسیا جام سیالیو کې د ګډون لپاره دغه هېواد ته ولاړه شي.
د دغه سیالۍ وروستی پړاو به په اندونیزیا کې د ۱۴۰۴کال د سلواغې له ۷مې تر ۱۸مې نېټې پورې (د ۲۰۲۶کال د جنورۍ له ۲۷مې د فبرورۍ تر ۷مې نېټې) ترسره شي، چې ۱۶ لوبډلې به پهکې ګډون وکړي.
د افغانستان د فوټسال ملي لوبډله د دغه سیالیو په څلورم ګروپ کې له ایران، سعودي عربستان او مالیزیا سره همډلې ده.
د سیالیو بشپړه ډلبندي:
لومړۍ ډله: اندونیزیا، عراق، قرغزستان، سویلي کوریا.
دویمه ډله: ټایلنډ، ویتنام، کوېټ، لبنان.
درېیمه ډله: جاپان، ازبکستان، تاجکستان، اسټرالیا.
څلورمه ډله: ایران، افغانستان، سعودي عربستان، مالیزیا.
د ډلبندۍ په لوبه کې بیا د بغلان ټیم د کندز پر وړاندې په ۶-۴ بریالی شو او درېیم ځای یې وموند.
د پایلوبې ستوری عمر بیک و، چې په دې لوبه کې یې پنځه وزې ترلاسه کړې او د خپل ټیم په بري کې یې ټاکونکی رول ولوباوه.
نوموړی په نیمه پایلوبه کې هم وځلېد و او پنځه امتیازونه یې ترلاسه کړي وو.
دغه سیالۍ د لیندي پر ۲۱مه د ۱۱ ټیمونو په ګډون پیل شوې وې او له لسو ورځو پرلهپسې سیالیو وروسته د دوشنبې په ورځ پای ته ورسېدې.
