په جلا وطنۍ کې د افغانستان د ازادو رسنیو د ملاتړ بنسټ (نی) په یوه لیک کې د پاکستان له لومړي وزیر شهباز شریف څخه غوښتنه کړې، چې په دغه هېواد کې د میشتو افغان خبریالانو او رسنیو د کارکوونکو د وضعیت او ویزو په برخه کې همکاري وکړي.
نی په یوه لیک کې له شهباز شریف څخه په دغه هېواد کې مېشتو افغان خبریالانو د ویزو د غځولو او په دې بحراني وخت کې د دوی د خوندیتوب او امنیت ډاډمن کولو لپاره د اړینو ګامونو اوچتولو غوښتنه کړې ده.
په لیک کې راغلي، چې د پاکستان لومړی وزیر دې ددغه هېواد د کورنیو چارو وزارت ته لارښوونه وکړي، چې د ټولو افغان کډوالو په ځانګړې توګه خبریالانو او رسنیو کارکوونکو سره له انساني وقار او بشري اصولو سره سم چلند وکړي او د هر ډول سخت او نامناسب چلند څخه په کلکه مخنیوی وکړي.
په لیک کې راغلي:«په ژوره خواشینۍ سره ویل کیږي، چې په پاکستان کې د افغان خبریالانو او رسنیو ډیری کارمندان اړ شوي چې ځانونه په خپلو کورونو کې محدود کړي او د زندان په څېر شرایطو کې ژوند کوي، ځکه دوی په جبري ډول افغانستان ته له شړل کېدو ویره لري».
په جلا وطنۍ کې د افغانستان د ازادو رسنیو د ملاتړ بنسټ (نی) وايي، د دوی راپورونه ښیي چې په پاکستان کې د افغان خبریالانو وضعیت خورا حساس پړاو ته رسیدلی او ډیری یې د روغتیايي خدماتو په ګډون له لومړنیو خدماتو څخه محروم دي.
د یادې شبکې په وینا، افغان ژورنالیستانو، چې په جلاوطنۍ کې دي، نی ته وویل چې له سختو مالي ستونزو سره مخ دي.
نی په پای کې یو ځل بیا د پاکستان له لومړي وزیر څخه غوښتنه کړې، چې په دې سخت وضعیت کې د افغان خبریالانو د ستونزو په حل کې ګامونه واخلي.
په خوست کې ځايي سرچینو نن سې شنبه، د مرغومي ۲مه وویل، چې په خوست کې د محلي رسنیو خبریالانو ته د طالبانو د والي ویاند او امنیه قوماندانۍ ویلي، چې د امربالمعروف ریاست د امر پر اساس له دې وروسته رسنیو ته خپلې ویډیوګانې او د ساکښو انځورونه نه ور کوي.
له څو ورځو راهیسې د طالبانو د خوست والي ویاند ترڅنګ ددغه ولایت امنیه قوماندانۍ په ټولنیزو رسنیو کې د ساکښو د انځورونو خپرول بند کړي دي.
خوست ۲۴ ولایت دی، چې د ساکښو انځورونو پر خپرېدا پکې بندیز په رسمي ډول پلی کېږي.
طالبان دا بندیز د طالبانو د امر بالمعروف او نهی عن المنکر قانون د ۱۷مې مادې پر بنسټ پلی کوي.
د ۱۴۰۳ کال په زمري میاشت کې د یاد بندیز د پلي کېدو د لړۍ له پیل راهیسې، تر دې دمه پر خوست سربېره په ۲۴ نورو ولایتونو پکتیا، کندهار، تخار، بادغیس، هلمند، ننګرهار، نورستان، فراه، نیمروز، بدخشان، بغلان، جوزجان، زابل، پروان، کندز، بامیان، دایکندي، فاریاب، پنجشیر، لغمان، سرپل، بلخ او هرات کې هم یاد بندیز په رسمي ډول اعلان او پلي شوی دی.