جرمني د سېشنبې سهار په لومړیو ساعتونو کې یو بل افغان، چې « مجرم» ګڼل شوی، افغانستان ته استولی دی. د جرمني فوکس رسنۍ ددغه هېواد د کورنیو چارو فدرالي وزارت د معلوماتو له مخې ویلي، چې یاد افغان وګړي په بایرن ایالت کې څو ځله د بند سزاوې تېرې کړې وې.
پر نوموړي دا تور هم و، چې د قصدي بدني زیان اړولو هڅه یې کړې ده.
د جرمني چارواکو دغه افغان د سېشنبې په ورځ په کابل کې د طالبانو ځايي مسوولینو ته سپارلی دی.
د جرمني د کورنیو چارو فدرالي وزیر الکساندر دوبرېنت فوکس ته ویلي، « افغانستان ته شړنې باید په منظم او عادي ډول عملي شي».
هغه زیاته کړې، چې « دا زموږ د ټولنې په ګټه ده، چې مجرمان باید زموږ هېواد پرېږدي. موږ د کنټرول، پایلو، روښانه دریځ او د مجرمانو او امنیتي ګواښونو پر وړاندې د صفر زغم پلوي یو».
دوبرېنت د جولای په میاشت کې اعلان کړی و چې وزارت یې د اخراج اسانه کولو لپاره په مستقیم ډول له طالبانو سره هوکړې غواړي.
داسې ښکاري چې دا هڅه اوس بریالۍ شوې ده. تېره اونۍ هم برلین کابل ته یو مجرام افغان استولی و.
